Il y a environ dix ans que certain Chirurgien tira en cette ville de Paris un petit enfant de la corne gauche de la matrice, en l’ouverture du corps de certaine femme, où il assista des Medecins. J’ay pareillement ouy dire à des Chirurgiens dignes de foy qu’il fut trouvé, il y peut avoir trente ans, un fœtus tres-bien formé dans ces vaisseaux en ceste mesme ville de Paris : et certes je crois que c’est le lieu que Maquardus a designé, là où il dict en sa Practique empirique qu’il a rencontré une masse de chair qui s’estoit formée au-delà du fonds de la matrice dans les vaisseaux spermatiques. Mais je n’en trouve point qui vaille ce qu’on a veu depuis peu arriver à Bourges avec beaucoup de reputation.

Madame le Conte mariée à Monsieur Agard Thresorier general de France, qui estoit une des belles et sages femmes de son pays, dit ce medecin, aagée d’environ trente ou trente [et] un an, receut son mary à son retour de Paris, où il avoit sejourné environ huict ou dix mois, avec un contentement indicible, et devint enceinte de leur premiere entreveue : tous les quatre premiers mois de ceste grossesse, elle ne sentit rien d’extraordinaire, tout y estoit aussi doux et aussi moderé qu’aux precedentes : elle se pleignoit seulement de certaine tumeur dure avec quelque sentiment de douleur, qui s’estoit faicte un peu au dessus de l’heine, au costé droict de la grosseur d’un poing ou environ, que mesme elle avoit faict souvent remarquer à son mary, en luy portant sa main dessus. Elle n’avoit presque point de mal de cœur : les lassitudes et defaillances ordinaires aux femmes enceintes, ne la travailloient pas plus que de coustume : en un mot, ceste grossesse, qui estoit sa huictiesme, ne faisoit rien paroistre, qu’elle n’eut desja senty aux precedentes ; jusques au quatriesme jour du mois de Janvier, de l’an 1614, qui estoit le quatriesme mois de sa grossesse, auquel sur le soir elle fut tout d’un coup saisie d’une douleur insupportable joignant les os pubis, que des frequentes defaillances accompagnoient, voire mesmes des syncopes renouvelez de temps en temps. Elle sentoit une douleur extreme depuis le fonds du ventre jusques à la gorge. On appelle le Medecin, qui accuse d’abord la matrice de ce desordre et certes avec toutes les apparences du monde, puisqu’on ne lui avoit rien declaré de la tumeur qui estoit au dessus de l’heine. Il luy ordonne soudain un lavement, qui fut suivy par les remedes specifiques aux malades hysteriques, avec un succes qui rabatit quelque chose de la rigueur de son mal. La moytié de la nuict s’estant passée en ceste sorte, le Medecin se retira, et laissa le soin du surplus à la sage femme qu’on avoit faict venir, sur l’apprehension qu’on avoit euë qu’elle n’accouchat. Mesmes toutes choses furent en elle plus calmes pendant le reste de la nuict jusques sur les cinq heures du matin qu’elle trépassa par le redoublement de ces douleurs et l’aneantissement de ses forces.

On appelle le Chirurgien avec diligence pour tirer l’enfant en vie qu’on vouloit faire baptiser. Il faict ce qu’on desire, et trouve soudain qu’il a ouvert le ventre inferieur, sept ou huict livres de sang figé au dessoubs des intestins : il ne se peut imaginer d’où ceste si grande quantité de sang peut estre venuë. Mais l’enfant qui s’estoit jetté au costé droict du ventre apres avoir deschiré les vaisseaux dans lesquels il estoit enfermé, que le Chirurgien prenoit pour la matrice, luy fit juger ce qui en estoit, que ce sang avoit esté rendu par ces vaisseaux. L’enfant, soit qu’il fut en vie, soit qu’il fut desja mort, car c’est surquoy on n’est pas bien esclaircy, estoit tres-bien formé et acccompy en toutes ses parties : l’ourache mesme y paroissoit attaché au nombril, et à la tunique Amnios, qui estoit la seule bien formée entre celles de l’arriere-faix : c’estoit une fille de la hauteur de cinq poulces, et de la pesanteur d’autant d’onces.

On faict ce pendant rappeller le Medecin, à qui on raconte ce que le Chirurgien avoit remarqué en presence de beaucoup de personnes : il trouve bon qu’on revoye encore un coup toutes ces choses, et se faict monstrer les reins de ceste Dame, qui luy en avoit autrefois faict des plaintes, ils furent recognus sains, mais d’une grandeur fort extraordinaire : il passe aux ureteres, et trouve le testicule gauche petit à son ordinaire. Mais comme il cherche le droict (dans lequel, dans le vaisseau ejaculatoire, et dans la corne droicte de la matrice l’enfant avoit esté enfermé) il y trouve tout en pieces, les glandes du testicule toutes esparses et escartées çà et là, les membranes du vaisseau ejaculatoire tout à facit brisées jusques à la corne du costé droict de la matrice qu’il rencontra vuide, entiere ridée, de la grosseur d’un poing, et semblable à celles des femmes qui ne sont point enceintes. Il vit seulement dans sa cavité certain amas de chair, qu[i] l luy fit soupçonner un commencement de masse : il passe outre, et tasche de trouver quelque passage par où l’enfant ou la semence puisse aller de la matrice dans sa corne droicte ; mais il ne rencontre que les destours et anfractuositez accoustumées des conduis : et partant il conclud que la grande quantité de sang respandu par toute la cavité du ventre inferieur, et causée par l’ouverture que l’enfant avoit faict des vaisseaux, ne pouvant plus durer en si peu de place, avoit donné la mort à ceste Dame.
 

Mais bien que Galien ayt par un solemnel decret, qui a attiré à soy le consentement general des medecins, determiné, que l’introduction du membre de l’homme est une circonstance absolument requise en la conception ; si est-il pourtant veritable que nous avons veu, il n’y a pas long temps, en ceste ville de Paris, une femme à qui des mauvaises couches avoient deschiré toutes les parties genitales ; mais qui furent ensuitte recousuës et si exactement rejoinctes par une cicatrice estroicte, qu’à grand peine y estoit-il resté assez de passage pour la poincte du bistory. La femme neantmoins ne laissa pas de concevoir quatorze ans apres cela ; la semence ayant esté respandue entre les levres de la partie honteuse : d’où la matrice, qui avoit souffert une longue faim de ceste viande, l’attira à soy avec avidité, presque en la mesme sorte, que le cerf tire à force d’halener, les serpens des plus profondes tanieres.

Le temps de l’accouchement de ceste femme estant arrivé, on aggrandit le trou avec le speculum matricis, et elle se delivra fort heureusement. On avoit desja veu à Paris en l’an 1609 une histoire semblable, d’une femme qui n’estoit pas percée, laquelle accusa en Justice son mary d’impuissance. Leurs parties furent par ordonnance du Juge visitées, et elle trouvée enceinte. Il est escrit en la Clementine 1. Quest. 15 de consanguinitate, qu’il fut jadis veu en France certaine femme qui avoit esté engrossée, avec toutes les marques de virginité : et partant on disoit d’elle, que c’estoit une pucelle enceinte.

Je trouvay en une femme de qualité qui mourut trois heures apres avoir accouché, cet orifice extremement charnu et esgal en largeur à la cavité de la matrice : la dilation avoit bien esté si grande qu’elle n’avoit pas laissé mesmes des apparences des caruncules de l’orifice exterieur, tout avoit esté emporté par la violence de cet eslargissement. La substance mesme du col exterieur ou fourreau du ventre estoit molle, charnuë, et unie dedans et dehors.
 

En l’an 1612 le vingt deuxiesme jour de May, certaine femme enceinte, nommée Geneviefve Supplice, fut (par je ne sçay quelle fatalité de nom) penduë à Paris, apres avoir esté visitée par les Chirurgiens et Sages femmes, qui à cause qu’elle estoit extremement grasse, ne descouvrirent point sa grossesse ; c’est pourquoy elle fut à cause de ces larrecins envoyée au supplice, quoy qu’elle ne cessast jusques aux derniers abois d’opiniastrer, qu’elle estoit enceinte, et qu’elle sentoit à tous coups le mouvement de son enfant. J’en obtins le corps du Juge Criminel, pour en faire l’Anatomie, ce que je fis publiquement en presence de plus de trois cens Spectateurs, partie Docteurs, partie Escoliers en Medecine, et autres gens de lettres, qui accourroient en foulle à un si nouveau et si extraordinaire spectacle, où ils eurent moyen d’apprendre en quatre leçons continuées pendant deux jours consecutifs, l’histoire universelle du fœtus humain.

Ceste femme estoit enceinte de cinq mois, comme il fut jugée par la grandeur et accomplissement de son fruict. J’y fis devant que d’en venir à la dissection quantité de remarques d’importance. Il descouloit du laict par ces mammelles, en les espreignant, la tache oriculaire qui environne le mammellon estoit fort eslargie. Le nombril paroissoit relevé sur le ventre par une eminence extraordinaire. Les caruncules de l’orifice exterieur estoient bouffies et confusément rengées les unes aupres des autres, et sembloit-il, que de toutes ensemble il ne s’en faisoit qu’un cercle membraneux. Apres avoir ouvert le ventre, je decouvris des testicules blanchastres, et applatis, qui estoient situez de part et d’autre, environ le milieu de la matrice. La trompe de la matrice n’estoit pas plus longue ny plus ouverte qu’aux femmes vuides ; mais les vaisseaux spermatiques deferans estoient de la grosseur d’un petit doigt, qui estoit plus remarquable au droict qu’au gauche. Le vaisseau ejaculatoire droict, qui estoit plus gresle que le gauche, et qui sortoit de part et d’autre par le milieu du testicule, se divisoit manifestement en trois rejettons joignant le fonds de la matrice. L’un desquels s’alloit rendre à la trompe de la matrice. L’autre dans le fonds de la matrice, et le troisiesme en costoyait tout le corps jusques à l’orifice interne du col. La substance estoit egalement espaisse, partout d’un travers de doigt, et percée partout entre deux tuniques, en façon d’esponge. Il est vray que les trous et les ouvertures en estoient plus remarquables dans le fonds. On n’y voyoit pas seulement des apparences de la moindre veine : mais il couloit manifestement du sang, par où les veines et arteres hypogastriques se terminoient, qui montoient de bas en haut, par toute la matrice. La veine hypogastrique estoit de la grosseur d’un poulce, et le col de la matrice estoit partout egalement dur en façon de callus, et son orifice exactement bousché par l’entremise d’une humeur gluante, qui en coloit les levres en façon de ciment. Le fourreau du membre viril paroissoit fort charnu, et entre-couppé de veines, qui estoient surtout fort remarquables, en sa partie inferieure, par où il s’attache au boyau droict.

J’ouvris apres cela la matrice, et descouvris en mesme temps la masse de chair, qu’un bon nombre de fibres attachoient au fonds de la matrice, et qui, à mon advis, attiroit par toute sa substance, le sang de la matrice, sans autre communication ou anastomose de vaisseaux : elle estoit espaisse d’un travers de doigt. Je poussay ensuitte mon bistory à travers les membranes, et en tiray environ trois livres d’eau, qu’on eust pris pour de l’urine : mais ce fut apres en avoir recogneu l’usage, qui n’est pas de petite consequence pour les mouvemens du Fœtus. Je l’esprouvay en celuy-cy, qui flottoit sur ces eaux, et estoit porté à la façon d’un globe par tous les coins de la matrice, au moindre coup de doigt qu’on luy donnast, avec une vistesse incurable. C’est d’où j’appris que la situation que les Anatomistes ont donné jusques à present au Fœtus dans le ventre de sa mere, est un conte de l’invention de quelqu’un, qui n’en avoit jamais veu.

Je ne trouvay en celuy-cy que deux membranes, le Chorion et l’Amnios : le nombril y estoit long d’un pied et demy : mais il n’estoit point entortillé à l’entour du corps du Fœtus, que je trouvay en ceste posture. Il touchoit au[x] fesses du bout des tallons, soustenoit sa teste par ses mains serrées, et les portoit sur ses jouës de costé et d’autre, et appuyoit ses couldes sur ses cuisses.

Aussi est-il tres certain que ny celle-cy [la situation du fœtus rapportée par Platerus], ny toutes les autres que j’ay jusques icy rapporté ne s’accordent point avec celle que je fis voir en public, lors que je dissequay le corps de la femme enceinte, dont j’ay parlé cy-dessus, et dont l’enfant qui fut jugé de cinq mois, estoit placé dans la matrice en ceste posture. Il touchoit aux fesses des talons, il avoit les mains fermées, il appuyoit ses couldes sur les cuisses, et soustenoit sa teste par ses mains, qui s’ouvroient sur ses jouës.