Le Chirugien doit estre prudent et advisé lors qu’il voudra asseurer de la grossesse de la femme […]. Ce que Madame du Pescher nous a fait veoir à son grand regret, laquelle accoucha d’un seau d’eau, croyant asseurément estre grosse d’enfant : j’ay veu le contraire à la fille de feu Monsieur Marcel, laquelle fut jugée par quatre des premiers Medecins de nostre temps, et autant de Chirurgiens, et deux Sages-femmes n’estre grosse, neantmoins estant morte, à l’ouverture de son corps que je fis, fut trouvée grosse d’un enfant de six à sept mois.

Et de recente memoire, une femme de Chambre de Madame de Suilly a esté traictée par les plus experts Medecins et Chriurgiens de ce temps, qui luy ont ordonné depuis le troisiesme mois de sa grossesse, jusques au huictiesme Clisteres, Apostemes, Potions, Fomentations, Bains, Injections, sans luy pouvoir provoquer ses mois, sans pouvoir juger qu’elle fust grosse, asseurant elle-mesme qu’elle ne l’estoit point, sans en avoir aussi aucun signe, ains plustost d’avoir une Mole : En fin le neufiesme mois ayant opinion d’avoir une collique, accoucha en un village, d’une belle fille, opiniastrant mesme lors qu’elle travailloit n’estre point grosse, comme elle nous avoit tousjours  asseuré durant sa grossesse : Ainsi le Chirurgien estant appellé, soit en Justice, ou en particulier, pour juger de la grossesse de la femme, doit diligemment considerer quel jugement il en doit faire.

[…] Aucunes ont esté trompées en ce que plusieurs femmes ont eu des moles, lesquelles on estimoit estre un enfant, d’autant qu’à neuf mois (qui est le temps d’accoucher) la femme faisoit un effort comme pour accoucher : et neuf autres mois apres elles avoient de semblables douleurs, ce que j’ay veu à Madame de Chasteau-morant.

Et pour le regard des choses qui sont Annexes à la mere, j’entends ce qui peut estre creu et contenu en la matrice, ou dedans icelle, comme quelque aposteme, schirre, ou supercroissance de la chair : ou une mole ou mauvais germe contenu en icelle : Comme aussi grande quantité d’eaux, ce que j’ay veu depuis  peu arriver à une honneste Damoiselle, laquelle en son huictiesme mois avoit sa matrice si pleine d’eaux, que le col d’icelle fut contraint de s’ouvrir pour les vuider, ce qu’elle fist, en si grande quantité, qu’il est incroyable, et six jours apres accoucha, le col de ladicte matrice ne s’estant refermé.

Car il se trouve des femmes, à qui les eaux sortent  et écoulent long temps auparavant et en grande quantité, qui ne sont prestes pour accoucher si promptement : ce que j’ay veu advenir à plusieurs femmes ; et de recente memoire à Madamoiselle Arnaut, laquelle estant grosse de six à sept mois, et travaillée d’une grande colique  qui luy dura prés de deux mois, qui la prenoit tous les jours à certaines heures : Estant en sa maison d’Andili me pria de l’aller veoir, pour avoir mon advis si elle devoit venir en ceste ville, ce que je luy conseillais de faire, tant pour les grandes douleurs qu’elle avoit, que pour son enorme grossesse, ayant opinion qu’elle pouvoit avoir deux enfans, comme elle avoit eu, il n’y avoit qu’un an : Estant arrivée à Paris, sa colique s’appaisa aucunement, peu apres elle vuida pres d’un demy seau d’eau sans douleur, estimant comme n’estre plus grosse : cinq jours apres accoucha d’une belle fille fort heureusement et avec peu de douleur, sans qu’il luy écoulast que peu d’eau. J’ay veu une certaine Dame, à laquelle quantité d’eaux s’écouloient plus de dix jours devant que d’accoucher, sans s’alicter, vaquant à ses affaires ordinaires. Ce qui est grandement à considerer, afin de ne precipiter l’accouchement, si les douleurs ne surviennent, et ne soient propres et telles que nous avons décrites pour accoucher.

L’an 1607 au mois de May, Monsieur de la Nouë, Chirurgien ordinaire du Roy, et Juré au Chastelet de Paris, fut appellé pour voir et visiter une jeune femme Orphevresse, laquelle avoit esté adjournée par son mary, pour comparoistre devant l‘Official de Paris, portant l’exploict qu’elle n’estoit naturelle ny capable d’estre mariée: Occasion que Germaine Hassa[r] Sage-femme, fut appellée pour la visiter avec ledit de la Nouë. Il fut trouvé qu’en l’endroit de l’orifice exterieur de la matrice, il y avoit une membrane forte et dure, et si époisse que le doigt de la main, et moins le Pudendum du mary ne la pouvoit enfoncer, ayant essayé de ce faire plusieurs fois, luy estant à ceste occasion survenu un Paraphimosis. Et pour ce fut conclud que son mary avoit raison de l’avoir citée, mais que cela estoit curable.

Surquoy le mary trouva expedient d’y appeller Messieurs de Leurye et Pierre, Chirurgiens  Jurez à Paris, tous trois d’un commun advis conclurent de faire l’ouverture de la membrane, ce qui fut fait: et fut traittée et guarie, au contentement du mary, sinon qu’il estoit en doute de ce que ledit de la Nouë luy avoit dit et remarqué (que le ventre de sa femme estoit plein) d’autant qu’elle estoit degoustée, et vomissoit tous les matins: ce qui luy donnoit quelque soupcon de grossesse; sur quoy une Sage-femme luy dist, que c’estoit dire et juger l’impossible, que ceste jeune femme aagée de dix-huict ans, fust enceinte, sans que son mary eust entré dedans le cloistre virginal: et que pour avoir battu à la porte de la grange; qu’elle ne pouvoit estre pleine. A tel different Monsieur Pierre fut derechef appellé, lequel ne le pouvant croire, jugea, après l’avoir bien consideré, qu’elle estoit grosse: Ce qui fut trouvé veritable, d’autant que (quatre mois après l’incision faite) elle accoucha fort heureusement à terme, d’une belle fille.

Mademoiselle Scaron m’envoya querir, pour secourir une sienne fermiere, qui estoit grosse et preste d’accoucher, laquelle avoit depuis quatre ou cinq ans l’entrée du Col exterieur de l’amarry si exactement fermé, collé et joinct ensemble, qu’il estoit impossible d’y mettre une petite sonde ; ce qui luy estoit advenu pour un mauvais accouchement ; au moyen duquel l’entrée dudict Col de l’amarry avoit esté ulceré, et les ulceres cicatricées, et toutes les parois dudit Col unies ensemble, et toutesfois ne laissa d’estre engroissée. A l’heure de son accouchement, par l’advis de Messieurs Riolan, Charles, Professeur pour le Roy en Medecine, et Docteurs Regens en la Faculté de Medecine à Paris, Brunet, Paradis, Riollan, Fremin, Rabigois, et Serre, Chirurgien de la Royne Marguerite, Mitton, et Choffinet, maistres barbiers et Chirurgiens du Roy, et moy, on luy fit une incision, par le consentement de tous, puis soudain le Speculum dilatatoire fut si bien appliqué, que toutes les cicatrices furent eslargies. Ce qui succeda si heureusement, que trois heures apres elle accoucha facilement.

Quelques femmes ont esté trompées pour avoir pris ladite vessie ainsi pleine d’eau, pour les eaux qui se forment de l’enfant, ayant esté cause de faire crever ladite vessie. Ce qui est digne de grande consideration. Ledit col de la vessie peut estre bouché de quelque carnosité, inflammation, ou pierre, ce que j ‘ay veu à une honneste Dame s’estant presenté au col de sa vessie une petite pierre qui fut cause de luy retenir son urine, et luy ayant destournée par la sonde, urina. Neantmoins  ladite pierre se presentant de rechef dedans ledit col, lorsque l’enfant vint à sortir, pour la longue demeure que la teste dudit enfant fit audit passage, ladite pierre meurtrist de telle façon ledit col, qu’il s’apostuma et suppura, et fit un petit trou, par lequel elle a long temps rendu son urine sans la pouvoir retenir. Histoire digne d’estre remarquée.

Je me suis trouvé à l’accouchement d’une pauvre femme malade, qui n’avoit esté à ses affaires il y avoit dix jours, ayant le gros boyau si remply et farcy d’excremens durs comme pierre, qu’il luy estoit impossible de recevoir un clystere. Nous feusmes contraincts devant que de l’accoucher, de luy tirer tous les excremens qui remplissoient ledit gros boyau, autrement il estoit impossible de luy tirer son enfant.

Plusieurs ne font difficulté sur la fin du neufiesme mois de baigner la femme avec bain universel ou particulier, tel que nous avons ordonné, comme aussi de donner à boire à la mere, tous les matins, huict ou dix jours avant son accouchement, une once d’huyle d’amendes douces tirées sans feu, avec deux onces d’eau de Paritoire. Ce que j’ay souventesfois experimenté à plusieurs femmes : et entre-autres à Madamoiselle Cappe, laquelle est accouchée plusieurs fois avec beaucoup de peine et de travail des ses enfans morts : mais depuis que je luy ay conseillé tel remede, graces à Dieu, elle a esté delivrée fort heureusement de plusieurs enfans vivans. Tels remedes servent à celles qui ont aussi quelques caillositez et duretez au conduit de la Nature.

L’experience nous fera manifestement cognoistre par les Histoires qui s’ensuivent, comme il est tres-necessaire d’accoucher la femme grosse, quand le flux de sang est grand, ou que les convulsions continuent, et qu’elle n’en peut estre garantie par les remedes ordinaires.

L’an 1599 mademoiselle Simon, à present vivante, fille de monsieur Paré, Conseiller et premier Chirurgien du Roy, estant preste d’accoucher, fut surprise d’un grand flux de sang, ayant pres d’elle Madame La Charonne pour Sage-femme, estant pareillement assistée de messieurs Hautin, Medecin ordinaire du Roy, et Docteur en Medecine à Paris, et Monsieur Rigault, aussi Medecin à Paris, à raison des grandes sincopes  qui luy prenoient de quart d’heure en quart d’heure, pour la perte de sang qu’elle faisoit : Monsieur Marchant, mon gendre, et moy, fusmes mandez. Mais la considerant presque sans poulx, ayant la voix foible, les levres blesmes, je fis prognostic à la mere et à son mary, qu’elle estoit en grand danger de sa vie, et qu’il n’y avoit qu’un seul moyen pour la sauver de ce mal, qui estoit de la delivrer promptement : ce que j’avoys veu practiquer à feu Monsieur Paré son pere, me l’ayant fait faire à une Damoiselle de Madame de Seneterre. Lors ladite mere et mary nous conjurerent de la secourir, et qu’ils la mettoient entre nos mains pour en disposer. Ainsi promptement, suivant l’advis de messieurs les medecins, fut heureusement accouchée d’un enfant plein de vie.

L’an 1600 il survint un flux de sang impetueux à une grande Dame, pour la frayeur qu’elle eut d’un grand esclat de Tonnerre, soudain il me fut commandé de l’aller visiter. Estant arrivé,  je recogneu que son flux de sang estoit fort appaisé. Mais comme elle estoit contraincte de s’en aller à douze ou quinze lieues de Paris : et craignant que ledit flux de sang ne continuast, Monsieur Marchand mon gendre la conduict audit lieu par eau : ou estant arrivé le flux de sang luy reprint : ce qui fut cause qu’il en donna un mauvais jugement, contre l’opinion de Monsieur de La Rivière, premier Medecin du Roy, qui estoit audit lieu. Occasion que je fus mandé en poste avec Monsieur Renard medecin du Roy : ou estant arrivé, les affaires estoient en meilleur estat, le dit sieur de La Riviere s’achemina vers le Roy. Mais soudain ledit flux de sang recommança : ce qui fut cause que l’on envoya querir Messieurs Marescot, et Martin, Medecins du Roy, lesquels ne peurent si tost arriver qu’elle ne fust accouochée. Ce que les parens et amis de ladite Dame, ensemble Messieurs Renard, Marchand, et moy, fusmes d’advis de faire, pour la grande perte de son sang qu’elle faisoit, et les sincopes frequentes qui la prenoient : et si tost qu’elle fut accouchée, ledit flux de sang cessa.

L’an 1603 Madamoiselle Danzé, ou Chece, fut surprise estant en son travail, d’un pareil flux de sang, qui luy dura depuis le matin jusques à huict à neuf heures du soir, estant assistée de Madame Boursier, Sage-femme de la Royne[.] Messieurs Le Fevre, Riolan, le Moine, Docteurs Regens en la Faculté de Medecine à Paris, et Monsieur de Sainct Germain maistre Apothicaire, furent appellez pour la traicter : et comme elle perdoit son sang, appellerent Monsieur Honoré Chirurgien du Roy, lequel ne voulant rien attenter sans mon advis, l’on me manda querir, et soudain que je fus arrivé, mon opinion fut avec celle de la compagnie de l’accoucher : ce qui fust fait par ledit Honoré, l’enfant estant vivant.
 

De recente memoire Madamoiselle Coulon (assistée en son travail de Madame La Charonne, Sage-femme fort experte) ayant un grand flux de sang, apres avoir esté traittée par Messieurs Martin, Hautin, Cornuti, Pierre, medecins du Roy, et Docteurs à Paris, pour luy arrester son flux de sang, en fin pour la crainte qu’ils eurent qu’avec son sang elle ne perdist la vie accouchant en sincope, par leur advis fut accouchée par ledit Honoré, et soudain ledit flux de sang s’arresta.
 

Mais comme les susdites femmes et enfans ont eu la vie sauve pour avoir esté accouchées en temps et lieu : aussi celles-cy apres nommées, ont perdu la vie pour n’avoir esté secourues comme l’art et l’experience le requeroit, leurs parens et amis n’ayant voulu permettre d’y mettre la main promptement. Ces deux histoires icy en feront foy.

Madamoiselle Vion estant preste d’accoucher eut un grand flux de sang, sur l’esperance que l’on avoit  qu’il cesseroit pour les remedes que l’on y apportoit, encore que l’on fust d’advis de l’accoucher sans plus differer, neantmoins s’arrestant au conseil de quelques personnes qui luy assistoient, petit à petit en perdant son sang perdit la vie. Le mesme arriva à Madame Gasselin, laquelle pour avoir esté trop tard secourue mourut, ainsi qu’il avoit esté predit, ayant perdu tout son sang auparavant que de consentir à l’accoucher ; ce qui sera cause d’instruire le jeune Chirurgien de ne differer telle operation quand il sera appellé à un grand flux de sang. Il y a vingt cinq ans que j’ay veu faire cette prattique à feu Messieurs Paré, et Hubert, ausquels, comme de plusieurs autres experiences, nous sommes obligez de le recognoistre, et confesser l’avoir appris d’eux.

Madamoiselle de Mommor, aagée de vingt et cinq ans, preste d’accoucher, se trouva mal sur les quatre ou cinq heures du matin, neantmoins se leva et alla à l’Eglise, prés de son logis, ses douleurs, par intervalle, recommençoient, ayant un flux de sang continuel : au bout de trois jours elle accoucha fort doucement, et sans que la Sage-femme luy touchast, mesme l’Arriere-fais suivit incontinent. Toutesfois elle mourut le mesme jour sur le soir ; elle fut gardée quelque temps par les parens, qui ne pouvoient croire qu’elle fust morte. Estant ouverte par Monsieur Pineau Chirurgien du Roy et Juré à Paris, en la presence de Messieurs Faber et de Baillou, Docteurs Regens en la Faculté de Medecine à Paris, on trouva la matrice rompue, éclattée et fendue par le costé gauche, à l’endroit où la veine et l’artere hypogastrique montent vers le milieu du corps d’icelle, lesquelles furent pareillement rompues, d’où estoit sorty grande quantité de sang.

Et pour ce qui regarde les convulsions, lesquelles viennent le plus souvent pour le grand effort que fait l’enfant desirant sortir, lequel n'estant bien tourné fait si grande extension à la matrice, que lesdites convulsions s’ensuivent : craignant qu’il ne déchire tout en dedans, il sera expedient d’accoucher soudainement la mere, ce que j’ay fait, et de recente memoire a esté prattiqué par Monsieur Binet Chirurgien Juré à Paris fort experimenté, lequel ayant esté envoyé querir par Monsieur Bouvart Docteur en Medecine, pour delivrer Opportune Guerreau femme de Sevestre Imprimeur, qui avoit esté travaillée depuis les huict heures du matin, jusques à neuf du soir, et trouvant son poux fort debile et petit, ayant perdu tout mouvement et sentiment, en faisoit quelque difficulté, mais invité qu’il fut de son mary, craignant qu’elle ne mourust bien tost, et qu’il ne luy print quelques convulsions, coulant sa main en la matrice, trouve le chef de l’enfant, sans que les eaux  fussent percées, lesquelles il perça, et en mesme temps la delivra heureusement. Et est encores pour le present plaine de vie.
 

L’an 1607 ledit sieur Binet fut appellé avec Monsieur le Moine, Docteur en Medecine à Paris, et Alton maistre Barbier Chirurgien à Paris, pour anatomiser le corps mort de Jeanne Du Bois, ayant ouvert le ventre inferieur, son enfant fut trouvé sur les boyaux, qui avoit rompu et brisé la matrice, estant passé tout au travers, avec quantité de sang respandu dedans la capacité dudit ventre.

Messieurs Pineau, Guerin, Lanay Chirurgiens Jurez à Paris me seront tesmoings, d’avoir assisté à  l’ouverture d’une pauvre femme qui mourut  à l’Hostel Dieu, dedans le ventre de laquelle, l’on trouva son enfant nageant avec les eaux, sa matrice estant rompuë par son fond.

Il peut advenir qu’une portion de l’Arrierefais, comme la membrane qui contient les eaux, se presente semblable à une peau qui sort du conduit naturel de la femme [… La membrane] ne doit estre tirée par force d’autant que l’Arrierefais souvent n’est separé des parois de la matrice, et en la tirant vous attirez le dit Arrierefais, et par consequent la matrice ou portion d’icelle, à laquelle il est attaché ; ce qui cause ordinairement des douleurs extrémes et desfaillance à la pauvre mere, voire souvent la mort ; comme à mon grand regret j’ay veu arriver à une honneste Damoiselle, laquelle soudain mourut apres avoir esté accouchée, s’estant mise entre les mains d’une Garde qui contrefaisoit la Sage femme, laquelle fut si hardie de luy tirer et arracher ladite membrane et portion de l’Arrierefais : ce qui nous fut découvert par une sienne fille de chambre, qui l’avoit gardée, laquelle nous la monstra apres son deceds, d’autant que nous estions en peine de sçavoir la cause de sa mort : mais telle chose advenant ladite peau ne doit estre tirée ains plustost doucement remise, ou bien entre icelle et le col de la matrice couler sa main pour chercher les pieds de l’enfant et les tirer comme nous avons dit cy-dessus. J‘ay cité ceste Histoire  au long pour le regret que j’ay eu de la mort de ladite Damoiselle, l’ayant accouchée par deux fois de ma main, n’estant assez tost arrivé pour la secourir la troisesme fois.
 

Et faut noter que pour bien tirer un Enfant du ventre de la mere, il faut prendre un couvrechef, serviette ou autre linge, afin de ne tenir à nud soit les pieds, cuisses ny corps de l’Enfant. […].

Il peut arriver que le col interieur de la matrice n’est si grandement ouvert que la main du Chirurgien ou Sage-femme y puisse entrer que difficilement, et avec grande douleur, le passage n’estant suffisant que pour y couler deux ou trois doigts par le moyen desquels l’on recognoist comme l’Enfant peut venir. Si l’on remarque que l’un ou les deux pieds se presentent aucunement, il faudra s’y gouverner en ceste sorte. Estant à Moret, traittant Monsieur le Comte Charles, je fus appellé avec feu Monsieur de La Corde, medecin du Roy, et de Paris, pour accoucher une pauvre femme qui estoit en travail, il y avoit deux jours et deux nuicts. Toutes les eaux estans vuidées, l‘Enfant estant demeuré à sec, le col interieur de la matrice s’estant resserré, n’ayant plus de douleurs ny Tranchées, ce que j’ay remarqué apres avoir coulé la main contre celuy col, et ayant enfoncé deux de mes doigts  au dedans, où je touchay l’un des pieds de l’Enfant, je me mis en opinion de la bien delivrer, ce que je fis en ceste sorte.

Premierement apres l’avoir bien fait situer : je fourray avec mes mains oinctes de beure et axunge de porc fondus ensemble, quantité d’icelle gresse pour oindre tout ledit Col, le plus qu’il me fut possible, et apres avoir un peu plus dilaté ledit Col, avec les trois doigts de la main, je portay un ruban avec un nœud-coulant, au pied de l’enfant, le serrant doucement, puis en dilatant davantage le col, je cherchay le second pied, auquel je glissay un autre ruban avec un nœud coulant, comme j ‘avois fait au precedent. Cela fait je tiray les deux rubans doucement et amenay les deux pieds ensemble lesquels estans attirez jusques  aux cuisses  je recommençay à faire force onctions comme dessus. Puis ayant pris un couvrechef, craignant qu’il ne glissast, commandant à la femme de s’efforcer le plus qu’il luy seroit possible, lors principalement qu’il luy viendroit des Tranchées et douleurs, et doucement en tirant quelques fois de ligne droite, et quelques fois à costé, afin d’eslargir tousjours le passage, je tiray l’enfant , en le retournant doucement le ventre contre bas, afin que le menton ne s’accrochast à l’os Barré, comme j’ay cy devant dit.

Il ne se peut pas tousjours bien cognoistre que la femme soit grosse de deux enfans, encore qu’elle soit en son travail.  Je me suis trouvé, il y a quelque temps à l’accouchement  d’une honneste dame, qui estoit grosse de deux Enfans. Et comme elle fut delivrée du premier, sans que la sage femme eust recogneu qu’il y en avoit un second ; voulant tirer l’arrierefais, je recogneu qu’il s’en presentoit un second au couronnnement. Et comme il venoit naturellement, elle en accoucha fort heureusement […].

Marie Beaurin, qui est encore vivante, femme de Guillaume Du Prat, vitrier demeurant ruë Saint André des  Arts, m’envoya querir il y a vingt-six ans, pour me monstrer une tumeur grosse comme le poing et plus, qui luy sortoit de sa matrice, laquelle estoit semblable à une vessie dure et ferme comme un fort parchemin, pleine d’eau assez claire, dans laquelle on sentoit au tact, une dureté assez longuette : icelle tumeur ou vessie  se remettoit facilement en dedans, lorsque la femme estoit située et couchée sur le dos, souslevant un peu les cuisses et fesses en haut, et la pressant avec la main (en la façon que l’on remet ordinairement les grosses hargnes intestinales) ce qu’elle fit en ma presence : et l’ayant interrogée depuis quel temps tel accident luy estoit survenu, me respondit qu’il y avoit plus de deux ans, ce qui estoit arrivé à son second accouchement, et neantmoins qu’elle avoit eu depuis six mois une petite fille, laquelle elle nourrissoit, mais que durant sa grossesse ceste vessie ne luy tomboit aucunement comme elle faisoit au precedent sadite grossesse derniere.

Je luy conseillay d’appeller Messieurs Paré premier Chirurgien du Roy, Cointret premier Chirurgien de la Royne Louyse et du Roy en son Chastelet, et autres Chirurgiens du Roy et de Paris, pour juger ce que ce pourroit estre ceste vessie : ils furent d’avis apres l’avoir maniée, la trouvant indolente, de la lier par en haut, apres l’avoir tirée dehors le plus qu’il estoit possible, puis la percer, ce que je fis, laissant le fil duquel j’avois fait la ligature longuette, pour le tirer quand il en seroit besoin [.] L’ouverture faite sortit quantité d’eau fort claire  et nette, et soudain se presenta un petit fœtus de la grandeur d’un doigt assez ferme et dur, sans avoir mauvaise odeur, attaché par son nombril, qui estoit gros et ferme comme une petite corde : six jours apres en esbranlant ledit fil le reste sortit, apres l’avoir tous les jours  esbranlé de costé et d’autre, doucement, et ayant fait plusieurs injections remollientes dedans la matrice, afin de le separer du lieu où il estoit attaché.

Les Jurisconsultes condamnent à mort celuy qui aura ensevely la femme grosse morte, devant que de luy tirer son enfant, pour luy avoir osté (avec la mere) l’esperance de vivre.

J’ay fait telle operation à quelques femmes fort heureusement, et entre autres à Madame le Maire, accompagné de Monsieur Philippe mon oncle : et à Madame Pasquier, soudain apres qu’elle fut decedée, presens Monsieur Paré, et le Curé de Sainct André des Arts.

Aucuns tiennent que telle section Cesarienne se peut et doit pratiquer (la femme estant vivante) en un fascheux Accouchement . Ce que je ne puis conseiller de faire, pour l’avoir experimenté deux fois, en la presence de Monsieur Paré, et veu pratiquer à Messieurs Viart, Bruner, Charbonnet, Chirurgiens fort experts : et sans avoir rien obmis à la faire dextrement et methodiquement. Toutesfois de cinq femmes, ausquelles telle operation a esté faite, il n’en est reschappé aucune. Je sçay que l’on peut mettre en avant qu’il y en a qui ont esté sauvées : mais quand cela seroit arrivé, il le faut plustost admirer que practiquer ou imiter. D’une seule Arondelle on ne peut juger le Printemps, ny d’une seule experience l’on ne peut faire une science.
 Apres que Monsieur Paré nous l’eut fait experimenter, et voyant que le succés en estoit malheureux, il s’est desisté et retracté de ceste operation, ensemble tout nostre College des Chirurgiens jurez à Paris, et la plus saine partie des Docteurs Regens en la faculté de Medecine à Paris : lors que ceste question fur suffisamment agitée par feu Monsieur Marchand, en ses deux declamations qu’il fit, lorsqu’il eut cest honneur de passer Chirurgien juré à Paris.

Il arrive quelquesfois peu après que la femme sera heureusement accouchée, et delivrée, que la matrice tumbe, pour quelques esprintes qui surviendront à l’accouchée, ou pour quelque volonté qu’elle aura d’aller à la garderobbe : comme j ‘ay veu advenir à quelques femmes et entre autres à une honneste Damoiselle : laquelle en s’exprimant pour aller à ses affaires (deux heures apres s’estre accouchée) fut estonnée que sa matrice  luy tumba entre les cuisses. Et comme à son secours elle appelle la Garde et quelques femmes qui luy assistoient, eurent opinion que c’estoit un faux germe qui estoit demeuré de son accouchement, et sur ceste creance elles tirerent par diverses fois ladite matrice : mais comme ladite Damoiselle se plaignoit de l’extreme douleur qu’on luy faisoit en luy tirant ladite matrice, fit appeler une Sage-femme qui fut de mesme opinion que sadite garde, l’asseurant que c’estoit un faux germe qui ne demandoit qu’à sortir, et estoit necessaire de le tirer [.] Mais pour la crainte qu’elle avoit de recevoir telles douleurs comme elle avoit fait par le passé, elle (sage et advisée) m’envoya querir et Madame La Charonne, Sage-femme fort experimentée. Ou apres avoir remarqué et jugé, que c’estoit la matrice, et qu’au lieu de la tirer, il estoit necessaire de la remettre, cela fut fait  en ceste sorte. Premierement ladite matrice fut doucement fomentée avec un peu de vin et d’eau tiede, puis avec linge chaud trempée en la susdicte liqueur petit à petit repoussée en dedans, ce qui fut fait fort facilement et avec peu de douleur[.] J’ay mis ceste Histoire pour instruire le jeune Chirurgien, afin de regarder diligemment, quelle partie peut sortir d’un tel endroict, et ne s’y abuser ny tromper. 

Il arrive quelquesfois que tout le perineum, ou entrefesson, est fendu jusques au siege, et que l’entrée de la nature de la femme, et le conduict, ou trou du siege, se mettent en un. Ce que j’ay veu advenir : et faute d’y remedier, les deux costez de la fente s’estans cicatrisez, les deux trous, ou conduicts, sont demeurez en un. Pour à quoy remedier, et estant appellé (la femme estant grosse), je luy conseillay d’attendre son accouchement, ce qu’elle fit : et comme elle fut delivrée, six semaines apres, m’ayant mandé pour la traicter, j’y proceday de ceste façon. […]

Telle fente fut guerie en quinze jours heureusement, durant lequel temps je luy fis donner deux clysteres, sans le premier qu’elle print devant que faire l’operation, afin de luy faire rendre plus facilement ses excremens. Mais devenant grosse, proche de la cicatrice, lorsqu’elle estoit en son travail pour accoucher, il se fit une nouvelle fente, laquelle toutesfois ne donna jusques au trou du siege et fondement, ayant esté fort dextrement soulagée, et doucement traictée par la sage-femme. Je luy avois conseillé premierement de l’oindre et frotter tout l’entrefesson et perineum d’un tel liniment.

Il se trouve des femmes lesquelles sont nommées par Hippocrate du mot d’Aqueuses, pour la grande quantité d’eaux claires comme celles de fontaine qu’elles vuident […] Celles qui sont subjectes à tel accident et decoulement, se plaignent d’une fadeur de cœur accompagné[e] de quelque lascheté, et sont contrainctes, lorsque telles eaux sortent à coup, comme il arrive quelquesfois, de prendre un peu de vin, sinon elles tomberoient en foiblesse et defaillance de cœur, ce qui est arrivé depuis peu à une honneste Damoiselle, laquelle Monsieur Seguin Medecin ordinaire du Roy, et son Professeur, et moy, avons traicté ensemble. Laquelle huict jours devant que d’accoucher, sans avoir aucune douleur, ny trenchées, vuida par divers jours plus de quatre ou cinq pintes d’eau claire, telle eau ne couloit du dedans de sa matrice, où l’enfant estoit residant : comme je recogneus, pource qu’elle avoit  le col interieur fort et exactement fermé, ains des venules qui sont au col exterieur d’icelle. Apres que les huict jours furent expirez, elle accoucha heureusement, avec peu de vidanges sanguinolentes, et durant les trois semaines de sa couche ne jetta autre chose que des eaux claires semblables à celles des fontaines, et faut noter que durant ses autres grossesses elle avoit les levres de sa nature tellement enflées, et plaines d’eau, ensemble tous les flancs et costez du ventre, que l’on les eust jugez estre deux hargnes aqueuses, et pour l’empeschement qu’elles luy faisoient de marcher, comme pour la crainte qu’il y avoit de ne pouvoir accoucher commodement, et pour l’extreme tension qu’elle sentoit, je luy conseillay, comme fit Monsieur Martin Medecin de la Royne, de me permettre de les ouvrir, ce que je fis, et les traictay […].
 

[…] car il se void des femmes, lesquelles en chaque grossesse ont des faux germes; entre autres Madamoiselle Bragelongne nous en a donné une preuve suffisante. Estant grosse de son second enfant, elle m’asseura qu’elle avoit un faux germe, pour en avoir eu en sa premiere grossesse : ce qu’elle recognoissoit par une dureté qu’elle avoit au costé gauche, proche des fausses costes où elle sentoit une grande douleur, mesme ses costes en estoient comme forjettées, et de fait en jetta un apres estre accouchée de la grosseur du poing, et plus, mais devant que le rendre, son ventre estoit enflé, avoit des douleurs et gourgouillemens autour du nombril, et vers les lumbes, elle estoit souvent travaillée de tranchées, comme si c’eust esté pour accoucher, nature s’efforçant à jetter et mettre hors ce qui luy est contre nature.
 

Plusieurs accidens arrivent souvent aux petits enfans sortans du ventre de leur mere : Aucuns par l’effort de l’accouchement reçoivent quelques contusions et meurtrissures, soit à la teste, soit à d’autres parties de leur corps, comme quelques [douleures] ou fractures de bras, ou de jambes, ou cuisses : Ce que j’ay veu advenir  par la difficulté d’accoucher. Aux deux derniers il faut y remedier, en remettant les os en leur place, soit qu’ils soient démis ou fracturez, puis les bander et contenir en leur estat, tant qu’ils soient bien asseurez et repris.

Et pour le regard des meurtrisseures, si elles sont en quelques parties du corps, il faudra y faire quelque petite fomentation, avec decoction de roses, et un peu de fleurs de camomille, et de melilot : puis y faire un liniment avec huyle rosart et d’hypericum meslez ensemble. Madamoiselle Maheu accoucha d’un enfant si meurtry, que l’on l’eust jugé pour estre mort, tant il estoit noir. Je le traictay avec les susdits remedes, et heureusement guerit.