En premier lieu je reciteray l'espreuve que j'ay veu faire pour faire concevoir, qui est succedé heureusement au souhait d'une femme laquelle avoit esté huict ou neuf ans sans avoir enfans : je luy feis prendre environ trois dragmes de jus de sauge avec un peu de sel menu qu'elle prit à jeun après avoir esté purgée de ses mois, se tenant quatre jours après sans avoir habitation avec son mary, et au bout de neuf mois accoucha d'un beau garçon.

Par la trop grande quantité des humeurs, et replection de la femme grosse, l'uterus et orifice interieur de la matrice [s]e faict lubricque et coulant, ce qui peut estre cause que l'enfant soit bien souvent avant le terme, aydé de quelques emotion[s], mesme d'une voix trop haute, d'un ris immoderé, comme j'ay veu advenir à une femme de nos quartiers, laquelle estant avec aucuns des voisins où il fut dict quelques paroles joyeuses à cause desquelles ladite femme poussant un ris immoderé, la vehemence duquel causa incontinent une precipitation du col de la matrice, lequel estant sorti hors la vulve, la longueur d'une paulme de main eust recours à quelques femmes qui ne peurent le remettre à cause qu'à l'instant il [s]e gonfla de telle sorte, que peu de temps après il fut saisi d'inflammation, thumeur et canpreine ; pour remedier auquel accident je fus appelé avec un de mes compagnons, ce que voyons nous fusmes d'advis de faire des scarifications en la partie, usant des remedes propres en telles indispositions par le moyen desquels après s'estre escoulé assez bonne quantité de sang, mesme avoir osté quelque portion de ce qui estoit sorty et deux jours après l'enfant presenta pour sortir un des pieds, ce qui me donna sujet d'accoucher et delivrer ladite femme et en suite nous pourveusmes au mal dudit col de matrice par injections de terciver et pessaires de mesme vertu, par l'aide desquels ladite femme fut totallement guerie.

Je fus appellé un jour pour secourir une femme en travail d'enfant lequel enfant avoit un bras sorty jusques dehors de la vulve, ce qu'[a]yant consideré, je teins incontinant ledit bras, non pas parfaictement ; mais de sorte que je trouve façon de couler la main jusques à un des pieds de l'enfant que je tire doucement puis l'autre pareillement, et ensuitte le corps d'iceluy enfant jusques au col par lequel il fut detenu demeurant en cet estat assez long-temps, quelque methode que je y peusse apporter : car cet empeschement estoit à cause d'une hydrocephalie, et grande quantité d'eaux qui estoient assemblées entre le crane, et la dure mere, ce qui fut cause que j'[ay] osté le corps laissant ladite teste dedans la matrice, ou l'ayant tournée et approchée proche le passage, un de mes compagnons qui estoient lors avec moy, passa son crochet, auquel il cassa habillement ladite teste de laquelle il sortit si grande quantité d'eaux que nous fusmes tous estonnez, et à l'instant elle sortit facilement, la femme sauve.