J’en ay assisté une […] laquelle estoit grosse, comme si elle eust esté à terme pour accoucher ; je fus d’avis qu’elle appellast des medecins, ausquels je dy ce que j’en pensois. Elle avoit des suffocations de matrice telles qu’à toute heure il luy prenoit des convulsions, ils la firent purger, seigner, baigner, ventouzer les cuisses, seigner du pied, tellement qu’elle ne se voyant sortir de peine à coup, ne voulut plus rien faire, et demeura deux ou trois jours sans remede, son mal la reprit plus qu’auparavant, elle n’y voulut appeler autre que moy, et disoit que rien ne luy servoit, je luy persuaday de recevoir une fumigation, dont j’avois veu faire estat, qui attire la matrice lors qu’elle surmonte et ayde à la purger, ainsi qu’elle eust demeuré à diverses fois dessus, elle sentit de grands efforts en bas, et jetta une chose qui s’entretenoit comme un sang bouilly, à demy pourry, si puant que l’on ne pouvoit durer en la chambre, et depuis se porta mieux : je n’attribuë de tout ce bien au remede seul, mais la plus grand part au traitement qu’elle avoit reçeu des Medecins bien estimez ; sont les remedes qui viennent à la fin du mal, le tout ensemble la tira de la peine où elle estoit, je l’escry afin que si quelqu’une s’en veut servir elle le puisse faire.
 

L’occasion la plus ordinaire qui fait accoucher les femmes, est la colere, laquelle survient quelquefois sur la formation de l’enfant, qui trouble tellement le sang, qu’elle est cause que tous les sens se retirent à leur principe, laissans l’œuvre imparfaict, tellement que nature retournant à soy-mesme, n’est reçeuë à le parachever puis après, n’estant un œuvre qui vueille estre une seule minute sans que nature y travaille, depuis son commencement jusques à son entiere perfection, qui est le jour de l’accouchement […]

J ‘ay receu, à une femme grosse de trois mois et demy, un enfant où estoit la teste avec tout le corps, duquel se voyoit fort bien l’espine du dos, les bras jusques aux coudes, les petits bouts de cuisses n’ayant point de jambes, ayant l’ombilic tenant du ventre à l’arriere-fais. Il sortit tout enveloppé avec ses eaux, lequel n’estoit du tout si long que le bout auriculaire ou petit doigt pris à la derniere jointure : à cause dequoy je prie et exhorte celles qui se sentent subjectes à telles choses, considerer le mal dont elles sont cause, d’avoir empesché la perfection de l’œuvre de Dieu, et d’avoir receu une ame pour le glorifier eternellement, ayant atteint le sainct Sacrement de Baptesme.

J’ay veu femme grosse de sept mois laquelle estoit tombée du haut d’une trappe en bas, et avoir bien perdu une poëllette de sang, laquelle fust mise au lict [.] Deux jours apres, comme elle se leva luy print telle douleur, avec une pesanteur, qu’il sembloit qu’elle deust accoucher [.] On m’appella et apres avoir entendu le discours de son mal, je trouvay que la pesanteur avoit fait ouvrir la matrice de la largeur d’une dalle, sans neantmoins qu’il y eust aucune formation d’eaux, qui me fit luy faire prendre le lict en diligence, puis sçachant qu’elle estoit loin du manger, je luy fis prendre les germes de sept ou huict œufs dans un œuf frais, avec de la foye cramoisie rouge, hachée menu environ un quart de gros [.] Puis je luy fis faire une fomentation de ciprés blanc, marjolaine franche et romarin, autant d’un que d’autre, amortis sur une pelle chaude, arrousée de vin fort couvert, mis entre deux linges dessus le ventre au dessous du nombril, et la rechauffer deux ou trois fois en un jour [.] J’asseure qu’elle porta son enfant deux mois dépuis, qui furent jusques aux neuf. Je n’ay rien veu de meilleur à faire, si tost qu’une femme se pense estre blessée. Je pense avoir aydé à en conserver plus de deux cents.

J’en ay veu une laquelle avoit eu plusieurs enfans, lesquels venoient tous imparfaicts, l’un avoit la teste où il ne se sentoit point d’os, estant comme une grosse membrane pleine d’eaux, venant à terme mort. J‘en ay veu à d’autres de semblables, je l’ay veu appeler aux Medecins, Hydro-Cephalos. J’en ay veu à ceste-la mesme un qui n’avoit aucuns os dans les doigts des mains ; cela [s]e fut pù prendre pour avoir manqué de semence, je ne le croy pourtant, ayant remarqué qu’à son dernier accouchement à terme elle fit une fille petite, comme si elle n’eust esté que de cinq mois, et moins charnuë : car elle n’avoit que les os et la peau venant au monde dans son arrierefaix avec ses eaux, lequel estoit du tout semblable à une vessie de porceau remplie de vent, sans que ces membranes-là fussent plus espaisses en un costé qu’en l’autre, sans y apparoistre aucuns vaisseaux qui peussent porter la nourriture à l’enfant, autres que ceux qui peuvent entretenir une vessie sortant d’un porc[.] Je fis diligence de l’ouvrir à l’instant que cela fut sorty, les eaux se trouver[e]nt toutes noires, et l’enfant mort. Je croy qu’il avoit esté nourry jusques au terme qui paroissoit, qui pouvoit estre environ cinq mois, et que dépuis il ne s’estoit trouvé sang pour le nourrir suffisamment, ains n’avoit fait que languir despuis, il ne se trouva aucune forme de ce gasteau, qui est receptacle du sang, [monstrant en cela que les personnes qui ne peuvent vivre qu’au jour le jour, ne peuvent faire provision de bled] ny en la veine ombilicale une goutte de sang, ny aux arteres goutte de sang arterial, qui demonstroit bien que la pauvre enfant n’estoit mort qu’à faute de nourriture, et avoit fait ainsi qu’un bon capitaine estant assiegé dans une place, qui fait durer ses vivres le plus qu’il peut, mais n’en ayant plus, est contraint de se rendre : ceste femme dont je parle ne laisse de se bien nourrir, mais j’ay recogneu que ce qu’elle mange, nourrissant legerement son corps, tourne plustost en pituite qu’en sang, et pour preuve de cela, je remarquay qu’après l’accouchement, le visage et le col luy enflerent, et se mist à cracher de telle façon qu’il est incroyable, qui monstre bien qu’elle est fort cacochime. Telles femmes à mon advis n’ont tant de sang qu’il faille leur en oster, pour conserver leurs enfans.

C‘est pourquoy il est tres necessaire qu’une femme appelle le Medecin, pour luy faire entendre son naturel, afin que par sa prudence il pourvoye comme il cognoistra bon estre, sçachant que femme telle que celle que j’ay representée, si elle estoit seignée, accoucheroit avant le temps, puis qu’à faute de sang elle produit ses enfans morts, et d’autres, faute d’estre seignées, en pourroyent faire autant, nature se trouvant ordinairement accablée par replection ou inanition, qui sont deux extremités ausquelles il faut obvier.

Qu’il y a un accident où il faut promptement accoucher une femme à quelque terme que ce soit pour conserver sa vie. CHAP. V

C’est quand une femme a une perte de sang desmesurée, sur sa grossesse, dont elle tombe en foiblesse, le plustost que l’on peut il la faut boucher, d’autant que l’air attire le sang, luy donner ce que l’on peut pour luy faire reprendre ses esprits, pour supporter l’accouchement, où il ne faut proceder d’aucun remede par la bouche, ny clisteres, d’autant qu’ils exciteroient la perte davantage, mais il faut venir à l’extraction de l’enfant avec la main[.] La foiblesse relasche les ligamens du col de la matrice, tellement qu’elle s’ouvre autant que si la femme avoit grand nombre de douleurs : mais les eaux ne se trouvant formées, il faut rompre les membranes qui environnent l’enfant, ainsi que l’on feroit une porte pour sauver une maison du feu, et tirer l’enfant par les pieds, c’est le moyen de sauver la mere, et de donner le Baptesme à l’enfant.

Je l’ay fait prattiquer par consentement, et en la presence du feu monsieur Le Febvre Medecin, et de monsieur Le Moine, et monsieur de L’Isle aussi Medecin, fort doctes, d’autant que j’avois veu que ces pertes-là, sont causes tout à coup de la mort de la mere, et de l’enfant[.] Cela fut fait en la femme d’un Conseiller de la Cour de Parlement laquelle estoit grosse de six mois, son enfant vescut deux jours, elle a porté d’autres enfants depuis[.] Les Medecins recogneurent que si l’on eust differé une heure d’avantage, la mere et l’enfant estoient morts. Monsieur Le Febvre recita ceste pratique-là aux escoles de Medecine, et dit qu’en tel cas, il conseilloit aux assistans d’y proceder de mesme, veu qu’il avoit veu mourir d’honnestes femmes, faute de l’avoir faicte[.]

Environ un an apres je fus appellée pour voir la femme d’un frippier de la place Maubert, laquelle n’avoit pas eu une perte si à coup[.] Elle fut quatre ou cinq jours : comme elle vit qu’elle n’en pouvoit plus, elle m’envoya prier de l’aller voir, je la treuvay en une sueur froide, le poux d’une personne qui se mouroit[.] J’envoyay querir un Chirurgien pour esviter le blasme, et pour oster le regret de la laisser mourir sans l’accoucher en diligence, lequel l’accoucha fort doucement[.] Elle mourut un quart d’heure après, estant ouverte il ne fust pas trouvé en son corps une goutte de sang, si elle eust esté secouruë en temps, l’on l’eust sauvée : sa sage femme luy disoit qu’il falloit laisser faire nature, et qu’elle en avoit eu autresfois de mesmes : je n’entend pas que si tost qu’une femme a une perte de sang, que l’on y procede de ceste façon-là, mais il faut veiller sur elle, comme le chat fait la souris, et faire la guerre au doigt, et à l’œil.

J’ay souvent accouché des femmes de deux enfans, soit fils et fille, soit de deux fils, soit de deux filles, encores que l’on die quand ils sont tous deux de mesme sexe, qu’ils ne vivent pas, j’ay veu, et voy vivre de toutes les façons que je viens de dire : le travail d’une femme qui a deux enfans est plus long que celuy d’une qui n’en a qu’un, d’autant qu’ils sont plus empressez, et plus foibles[.] J‘ay veu assez souvent le premier venir bien, et l’autre venir mal[.] Il est certain que le premier qui vient bien est le plus fort, lequel a le pouvoir de devancer l’autre, et de rompre les membranes, lesquelles le tenoyent enveloppé, et quand ils viennent bien tous deux à chef, lors que le premier est né, le second est enveloppé de mesme qu’estoit le premier, il s’en void demeurer long temps à venir apres l’autre, comme moy-mesme j’en ay reçeu un, douze heures apres une fille, mais il se trouva foible, et neantmoins s’est fort bien porté[.] Je me suis trouvé en mesme affaire, où je n’ay pas fait ainsi, car ayant recogneu que c’est le plus fort qui vient le premier, j ‘ay creu qu’il falloit ayder au second s’il y a douleur, pour rompre les membranes qui enveloppent ses eaux, et s’il n’y en a point, luy donner clysteres assez fort, pour exciter la douleur, afin de ne laisser partir ce foible, et il a reussi de façon, que si je ne l’eusse fait, le second n’eust peu souffrir la peine, d’autant qu’il estoit menu et foible, et pour preuve de sa foiblesse, il avoit l’os frontal separé d’un doigt de large, jusques sur le nez : Il est vivant aussi bien que le premier, l’os s’est rejoint, et se porte aussi bien que son aisné. Il fut advisé par Monsieur Martin Medecin, de laisser une grande compresse, sous un bandeau que je luy avois mis, pour empescher que l’air ne penetrast au travers du cuir

Je puis bien dire avec verité, qu’en plus de deux mille accouchements je n’en ay esté querir dedans la matrice que deux[.] Encores fust-ce à la premiere, que de l’enfant precedent qu’elle avoit eu, le boyau se rompit, dont la sage femme fut fort blasmée, la matrice se referma, de façon qu’il fallust luy faire rendre par clysteres, et potions par la bouche, lesquelles luy firent rendre avec telle quantité de sang, qu’elle fust trois mois pasle comme un linge, et tellement foible, qu’elle ne se pouvoit soustenir[.] J’apprehenday pareil accident, tellement que je le fus querir, joinct que le boyau estoit fort deslié, j’ay remarqué que les boyaux desliés sont fort subjects à se rompre prés du gasteau[.] L’autre que j’allay querir fut à une dame qui avoit une fiebvre continuë, laquelle l’avoit desseiché et rendu si adherent, qu’il ne me fut possible de l’avoir, puis que je ne voulois gueres travailler la dame à cause de la fiévre. Mais je n’en iray jamais en querir, si trois extremités ne m’y contraignent. L’une est une perte de sang extreme à la femme, l’autre seroit si elle avoit des convulsions, et l’autre, qu’une fiévre l’eust desseiché et rendu adherent (comme j ‘ay dit)[.] C’est dequoy je voudrois supplier les Chirurgiens qui accouchent les femmes, ou de les tirer comme les sages-femmes avec patience, ou les laisser tirer à la sage-femme : pour le deschirement que j’ay veu aux arriere-faix que quelques Chirurgiens vont querir : car ils les ameinent en tel estat qu’ils sont effroyables à voir, il est impossible à juger s’ils sont entiers ou non, veu qu’ils sont tous desrompus[.] L’on tient qu’un morceau demeuré est mortel, il le peut estre, puisque les membranes le sont, quelle asseurance pouvez-vous avoir de la vie d’une femme voyant l’arriere-faix tout rompu.

Les fautes que commettent souvent aucunes sages-femmes, me font dire qu’il est tres-necessaire, que les sages-femmes voyent l’anatomie de la matrice, afin de la discerner d’avec l’arriere-faix, et n’expulser l’un pour l’autre, comme il se fait assez souvent en ceste ville[.] Je sçay que dépuis quatre ou cinq ans de ma cognoissance, il est arrivé en trois lieux, l’un sous le pilier des halles, à la femme d’un sergent : l’autre proche Saint-Eustache, et l’autre en la ruë Saincte Avoye. Cela s’est assez sçeu par tout Paris, et s’il n’y a esté apporté aucun ordre, comment peut-on apporter remede à une partie que l’on ne cognoist point ? Ne sçachant à quoy elle tient, ny dequoy elle est composée, ny les frequentes maladies qui la peuvent travailler. C’est pourquoy je supplieray Messieurs nos docteurs en Medecine, tant gratifier le public, que de permettre aux sages-femmes, ayant quelque subject aux escoles d’y assister, en contribuant aux frais, comme je promets faire la premiere, recognoissant que c’est chose tres-utile.

Je fus appellée il y a environ huict ans, pour voir une pauvre femme grosse de six mois, qui avoit de grandes douleurs, par le moyen d’une extreme tension et dureté du ventre, tellement qu’il luy sembloit que son ventre s’en deust fendre [.] Entendant le mal je pensay que par le moyen d’un clystere, et de l’evacuation qu ‘il feroit, estant carminatif, l’excrement, et les vents estant hors, luy apporteroyent du soulagement, je luy en fis un, d’autant qu’elle n’avoit moyen d’en faire faire [.] Veritablement elle s’en trouva soulagée, et neantmoins porta son enfant encore un mois, avec beaucoup d’incommodités, et grandes tensions, au bout duquel, marchant par sa chambre, sentit un grand flux d’eau que si on avoit ouvert le robinet d’une fontaine [.] Elle prit un chauderon et le mit sous elle, où il tomba bien encore trois pintes d’eau, elle appelle une de ses voisines au secours, les eaux estant escoulées à coup, elle se sentit grandement allegée, et quoy que sa voisine luy peut persuader d’appeler du secours, ne le voulut faire sçachant que j’estoy en couche, elle dit qu’il suffisoit quand elle auroit du mal [.] Toutes les voisines furent voir ceste estrange evacuation, lesquelles lorsqu’elle accoucha, qui fut deux mois après me le conterent et elle aussi, me monstrant le chauderon, et à peu prés la quantité, qui excedoit demy seau, elle ne laissa pas d’avoir les eaux de son enfant, comme si cela n’eust point esté, tellement que c’estoit une hydropsie de matrice, qui n’estoit contenuë dans les membranes qui environnent l’enfant, ains dans la capacité de la matrice, et en plus de deux mille femmes que j’ay accouchées, je n’ay veu cela qu’en celle-là.

Il y a environ neuf ans, qu’une jeune femme m’envoya appeler, qui logeoit en la ruë Sacalie, pres S. Severin, laquelle avoit une grande colique, elle croyoit, encore qu’elle ne fust grosse de sept mois, devoir accoucher [.] Je la vy, et ne trouvant douleurs respondantes, ains plustost des vomissements de choses indigestes, je jugeay que ce n’estoit qu’une colique, je luy fy prendre des clysteres, le mal quoy que l’on peut faire luy dura trois jours, lequel venant à se moderer la laissa fort foible [.] Ce fut dés l’heure qu’elle ne sentist plus bouger son enfant en aucune façon : feu Monsieur Le Febvre Medecin la veit en son mal, avec Monsieur Elin, lesquels n’obmirent rien pour la soulager, et cognoistre si l’enfant estoit vivant [.] Je trouvay l’orifice de la matrice de la largeur d’un annelet, dont se lacent les femmes de village, sans aucun ply ny fronceure qui peust promettre de se pouvoir jamais dilater [.] Sur cela je croyoys que l’enfant ayant fait des efforts, pressé par ceste longue colique, et ne trouvant yssuë, fut mort à la peine [.] Je fey appeler feu Monsieur Marchand le fils, Chirurgien expert aux accouchemens des femmes, avec Monsieur Pietre le Chirurgien, homme fort capable et entendu, avec Madame Françoise, ancienne sage-femme, et en la presence des Medecins susdits, nous consultasmes de ce qui pouvoit estre de cest enfant : par plusieurs fois il fut conclu par tous, que l’enfant estoit mort [.] Car tous les signes que les Anciens ont remarqué pour cognoistre si un enfant est mort, estoient en ceste femme-là, la bouche si mauvaise, qu’on ne la pouvoit approcher, les excrements qui sortoient d’elle si extremement puants, qu’ayant esté à ses affaires dans la chambre, l’on ne pouvoit durer depuis la cave jusqu’au grenier [.] Elle avoit l’œil terny, le ventre infiniment froid, et quand elle se tournoit d’un costé, tout le ventre se tournoit comme une grande masse [.] Les uns parloient de l’operation Caesarienne, mais les Medecins n[y] Chirurgiens n’y voulurent pas conclurre, resoudant que ce seroit hazarder de faire mourir la mere, sans rien pouvoir esperer de l’enfant, remettant l’affaire en la main de Dieu et de la nature [.] Elle demeura cinq sepmaines au lict : cela estant si long, chacun la laissa, elle se leva et sortit quelque peu quinze jours ou trois sepmaines apres, les deux mois accomplis [.] Du commencement elle me vint voir qu’elle ne paroissoit plus grosse, elle me pria de la toucher ; me contant qu’il y avoit un jour et demy qu’elle rendoit merveilleuse quantité d’eau froide, comme glace [.] La touchant je trouvay l’orifice de la matrice qui avoit paru à nous tous ne se pouvoir jamais dilater, dilaté de la largeur de la paume de la main [.] Je la renvoyay chez elle, où elle accoucha le mesme jour d’une tres-belle fille saine et druë, son mal provenoit de ce que son mary estoit vallet de chambre d’un gentil-homme, lequel elle attendoit tous les soirs jusques à minuict où une heure, se relevant de terre, où elle se veautroit, se trouant enrheumée beuvoit une grande potée d’eau, engendra de grandes crudités, et amasssa beaucoup d’eaux lesquelles causerent la colique, laquelle cessant assiegerent l’enfant par leurs grandes frigidités, causant tous les signes susdits, tellement qu’il n’y a reigle si estroitte où il ne se trouve d’exception.

Je fuz appellée il y a environ neuf ans, pour accoucher une Damoiselle du pays d’Anjou, laquelle n’estoit grosse que de sept mois huict jours [.] Je la trouvay en grand travail, elle accouchoit en la façon de son pays à genoux, je la touchay ; et trouvay les eaux de l’enfant qui se presentoyent prestes à percer, je luy dis qu’elle eust courage et qu’elle accoucheroit promptement, et que les eaux alloient percer [.] Elle me dit que s’en estoit fait, et qu’elles l’estoyent, elle disoit vray et moy aussi, toutesfois je ne le voulu contester contre elle, sachant qu’il n’est pas tousjours à propos de contredire les malades, encores qu’on cognoisse le contraire de ce qu‘ils disent [.] Les douleurs la pressant, les eaux d’un enfant se rompirent, qui estoyent toutes noires, et elle accoucha d’un enfant mort, si gros et contrefaict que je n’ay rien veu de semblable. Car quand un enfant est tourné et mort, toutes les humeurs tombent à bas, ne trouvant plus de chaleur naturelle qui les repousse, il estoit donc effroyable à voir, et avoit la teste demy applatie, et verte, et n’y avoit plus ny derme ny epiderme entier [.]

Si tost qu’elle fut accouchée, la voulant delivrer, je trouvay un autre enfant qui se presentoit les pieds devant, lequel je tiray [.] La demoiselle croyoit que ce fust son delivre, mais quand elle l’entendit crier, elle fut bien estonnée, l’ayant couchée et pensée, elle me voyant remuer celuy-là, puis me voyant lever du foyer, elle me demanda où estoit l’autre : je luy dis qu’elle loűast Dieu d’en estre delivrée, et qu’il estoit mort de longue main : elle m’advoűa que le mal estoit provenu, ou d’avoir esté poussée au Palais, sollicitant un procez, ou bien d’une mauvaise habitude qu’elle avoit de s’appuyer sur le coin d’une table, et qu’elle croyoit asseurement que la faute en venoit de là. J’ay veu l’enfant nourrir neuf mois devant moy, lequel elle fit apres emporter en Anjou, c’est en quoy la nature se fait admirer, de dire que le vif aye chassé le mort, et que le mort n’ayt tué le vif.

J’accouchay une Dame il y a environ six ans, laquelle fut un mois entier sans sentir bouger son enfant. Les Medecins et moy, fismes tous les remedes qui se peuvent faire, pour voir si l’enfant pourroit remuer : mais ce fut en vain : il ne se sentit autre chose (appliquant une trenche d ‘une roűelle de veau lardée de clou de girofle, poudrée de muscade, arrousée de malvoisie, puis rostie sur le gril, et applicquée dans un linge sur le ventre) qu’une chose qui se haussoit qui estoit le corps de la matrice, laquelle estoit si refroidie de contenir cest enfant mort, que sentant la chaleur qui la consoloit, elle s’en approcha. Il fut bien recognu ce qui en estoit, elle n’eust jamais pendant tout ce temps-là une douleur de cœur, ny mauvais rapport à la bouche, elle eust tousjours bon œil, et bon visage, son ventre ne se tournoit à coup, comme il fait à celles qui ont des enfans morts, et neantmoins il l’estoit, c’estoit qu’il n’y avoit pas grand’ quantité d’eaux, mais elles estoient si froides, que par leur frigidité, elles repercuterent et l’enfant et l’arriere-faix, de telle sorte qu’il estoit plustost endurcy que tumefié, ce qui empescha les signes descripts par les anciens, qui ne sont causez que par corruption et pourriture.

Une Damoiselle desirant se servir de moy, m’envoya querir, je la fus voir un matin où je la trouvay qui s’abilloit, je ne vy jamais un tel ventre qu’elle avoit [.] Elle commanda à une sienne servante luy faire un clystere, comme elle avoit accoustumé, et qu’elle sentoit douleurs de reins [.] Je luy donnay le clystere et vy son mal de reins ne diminuer, je la chauffay et recognu en peu d’heure, qu’elle estoit en travail [.] Elle me conta avoir par l’ordonnance de M. Martin Medecin fort docte, esté saignée sus sa grossesse six fois, pris trois ou quatre medecines, bien cent clisteres, autrement qu’elle eust estouffé : elle en accoucha heureusement, sans beaucoup de peine, d’une fille laquelle venoit le chef devant, venant à sortir, je senty une telle dureté, qu’il me souvint d’un enfant que Monsieur du Laurens, premier Medecin du Roy, dit avoir veu à Sens en Bourgogne, en la boutique d’un Chirurgien, qu’une femme a porté dix huict ans, et est dure comme une pierre [.] Je pensoy en tenir un semblable, je vy une fille vivante et hydropique, dépuis la teste jusques aux cuisses, si dure qu’il ne se peut rien voir de plus dur, et jusques aux levres, il sembloit que l’on touchast du bois, elle avoit le ventre gros et tendu comme un balon, noir extremement, et sembloit que pour son extension, il n’y avoit petite ramaification de veine, qui ne fust rompuë [.] L’enfant vescut environ un quart d’heure, encore qu’elle fut bien grosse je pensay que elle n’estoit suffisante d’avoir occupé ce ventre-la [.] Voyant sa foiblesse, je liay et coupay som umbilic et l’envoyay tenir devant le feu, et envoyay querir le Vicaire de sainct Leusainct Gilles, pour luy donner Baptesme.

Cependant ayant touché la Damoiselle : je trouvay les eaux d’un autre enfant, prestes à rompre, lesquelles estant rompuës, il se presenta un petit garçon les pieds devant, qui estoit fort et dru, et a vescu quelque temps, le petit garçon venant à naistre, il sortit une si grande quantité d’eau de la mere, qu’il ne s’en vit jamais tant : je croy qu’il y en avoit un ceau, et estoient si jaunes, que les linges qui en estoient moűillez en estoient teints : je desiray que Monsieur Martin veit la mere et les enfans avec l’evacuation, d’autant qu’il l’avoit pensée durant sa grossesse, à celle fin de voir la cause de son mal, il estima un grand don de Dieu, dequoy elle estoit delivrée, et que c’estoit une vraye gangrene que le ventre de la fille hydropique : ce n’a esté en celle-là seulement, où j’ay recogneu que nature a une grand providence, de se sçavoir deffaire de ce qui luy est nuisible : pouveu que le mal soit contenu.

Je montray le lict de ses deux enfans à Monsieur Martin, il n’y en avoit qu’un pour les deux, avec la separation ordinaire de leur place [.] Le giste de la fille estoit plein d’une glaire jaune, et les veines par lesquelles estoit portée sa nourriture en sa veine umbilicale, estoient pleines d’un sang jaune, ainsi que l’on le tire ordinairement d’un pleuretique [.] Le giste du garçon estoit beau, et net, les veines par où estoit portée sa nourriture, estoient grosses et pleines d’un beau sang vermeil [.] Je l’ay veu deux ou trois jours apres sa naissance, il estoit devenu jaune comme font ordinairement la pluspart des enfans, et avoit toutes ses fonctions naturelles, mais il avoit telle quantité de phlegmes, que quoy que l’on y peut faire, il fut impossible de le sauver, et tout le mal de la Damoiselle et des enfans, est venu par sa confession d’avoir beu, elle dit qu’à tel repas elle a bien beu trois chopines d’eau pour la grande alteration qu’elle avoit.

Je diray ce que j’ay veu advenir à une femme du Fauxbourg Sainct Germain, laquelle j’ay cogneu d’enfance, et estions proches voisines lors que son premier accident luy arriva : Environ l’an mil cinq cens quatre vingts et six, elle accoucha de son premier enfant, lequel estoit mort en son corps [.] Feu Monsieur Milot medecin, auquel ceste femme appartenoit de quelque chose, voyant son travail fascheux, envoya querir une sage-femme qu[‘il] cognoissoit [.] Luy ayant abandonné la femme, la prya d’y faire ce qu’elle pourroit, elle se mit aprés et la delivra [.] Elle fut assez mal gardée, je diray en passant qu’il ne suffit pas qu’une femme soit bien accouchée pour bien relever, une garde qui ne l’entend pas, cause beaucoup de mal, comme je diray cy aprés [.]

Environ cinq ou six jours aprés son accouchement, l’esprit luy tourna, et fut tellement folle, quatre ans durant qu’il ne se veid jamais rien de semblable, car elle alloit malgré son mary, et ceux qui la gardoient toute nuë sans chemise par les ruës, et se fourroit par les maisons, où elle faisoit frayeur à ceux qui la voyoyent [.] Environ au bout des quatre ans elle se remit un peu, et peu à peu estant du tout remise, au fort du siege de Paris elle accoucha d’une fille, dont elle estoit devenuë grosse sur la fin de sa folie [.] Elle n’eust accident aucun en sa couche, ny aprés, car les viandes qu’elle mangeoit ne luy envoyoyent poinct de laict aux mammelles, ny ne faisoyent tant d’excremens que les vapeurs luy en peussent monter au cerveau [.]

Il y a environ dix ans qu’elle accoucha de deux enfans, l’un mort, et l’autre vif [.] Je ne la servy en ceste couche, et le cinquiesme jour elle ne faillict d’entrer en sa follie, qui fut telle que le quinziesme jour, elle fit tant qu‘elle envoya ceux-là qui la gardoyent, l’un deçà, l’autre delà [.] Ils pensoyent qu’elle commençast à se r’asseoir [.] Elle alla arracher le siege d’un privé, et se jetta dedans, Dieu la preserva : car elle demeura accrochée par ses habits, à quelque bois qui avoit autresfois servy à l’échafaudage [.] Ceux qui la gardoyent revenans à la chambre ne la trouvant, furent fort effrayez, et d’autant qu’en toutes ses deux folies, elle avoit tousjours tasché de se jetter aux privez, ils allerent voir, et trouverent le siege dehors, et effrayés, appellerent de l’aide pour la tirer : elle fut trouvée vivante et nullement blessée, ce fut de l’heure qu’elle se modera un peu, toutesfois elle fut dix huict mois sans estre du tout remise [.]

Ce qu’estant, deux ans et demy aprés elle accoucha, et m’envoyant querir m’ayant auparavant parlé, je recognus qu c’estoit travail : mais il n’y avoit enfant tourné, elle avoit le ventre si tendu que ses enfans ne pouvoyent faire leur culbute [.] Je sçeu d’elle qu’elle estoit opilée de cinq jours, et luy fis bailler clystere, lequel ayant rendu les exrement[s] hors, une grosse fille se tourna, et à six heures du soir elle prist le clystere, à minuict elle accoucha, et la touchant je trouvay un aute enfant, fort loin encore de venir, lequel venoit aussi le chef devant contre l’ordinaire : car le plus souvent y en ayant deux, le premier vient bien, et l’autre le cul devant ou les pieds [.] Ce que je peus faire, fut de la bien nourrir, luy donner courage, luy ceder un peu, cognoissant son esprit leger [.] Elle demeura jusqu’au lendemain deux heures et demye apres midy à accoucher de l’autre, qui fut un beau fils [.] Je treuvay nature presque accablée à l’expulsion de ce petit : car elle s’estoit toute reserrée, et estant affoiblie de la longueur eust plus de peine au second qu’au premier, s’il fust mal venu, elle n’eust tant enduré, car venant mal l’on l’eust peu tirer incontinent apres l’autre sans l’offencer : mais venant le chef, la sage-femme n’y doit jamais toucher, le crane en est si delicat, qu’y pensant toucher, l’on ne pourroit sans blesser le cerveau [.] De telle advance l’on s’est mal trouvé, à l’endroit d’une princesse, dont la mort de l’enfant en a bien causé d’autres [.] Les deux enfans dont j’ay parlé apporterent, chacun sur leur teste la membrane amnios, que l’on appelle leur coiffe [.]

Revenant à la mere, voyant que Dieu avoit beny mon œuvre à l’endroit des enfans, je le priay d’en faire autant envers elle[.] Je la voyoy tous les jours pour voir d’où pouvoit provenir sa folie : car tous ses parens, et ceux qui la cognoissoyent ne croyoient rien moins qu’elle y deust retomber [.] J’eu le soin de la faire bien nourrir ; luy donner clysteres de deux jours l’un, j’enseignay remede à sa garde pour faire evacuer son laict ; d’autant qu’elle ne fut jamais nourrice, ce qu’elle negligea. Le cinquiesme jour de sa couche je la fus voir, et la trouvay en fiebvre, et mesme que ce jour là, elle n’avoit rien voulu prendre ayant la veuë esgarée, avec des parolles qui ne se suyvoient nullement, et me disoit qu’elle avoit beaucoup de resveries en l’esprit, je luy donnay promptement un clystere et voulu voir son sein [.] Je trouvay que la garde n’y avoit rien fait et qu’il estoit fort dur [.] Je luy fis une embrocation dessus, d’huile rosat de vin-aigre, et dessus, des fueilles de choux rouges amorties sur le feu, et encores par dessus, un cataplasme de bon miel commun, sur des estouppes. Le lendemain je la fus revoir, et la trouvay rassise sans aucune fiebvre, et son laict fort evadé. Je fis continuer le remede et les clysteres, elle releva le dix-septiesme jour saine de corps et d’esprit, et a tousjours dépuis gaigné sa vie. Peu de chose quelquesfois faite à propos, tire des personnes de grand inconvenient. Je diray que je n’ay point veu de fiebvre plus aiguë, ny qui monte tant au cerveau apres celle du chaud mal, que celle causée par l’abondance du laict. Dedans le lict l’on brusle, et si tost que l’on met une main dehors, les frissons courent par tout le corps, et redoublant la chaleur, faict resver et parler sans raison. Ceste femme a accouché depuis, et observant les preceptes que je luy avois donné a esté garentie de retomber en cest accident, qui a esté d’user de clistere et faire prompte evacuation du laict.

Je reciteray icy une chose advenue à une jeune femme, que mon mary a pensée, comme je diray : c’est qu’elle estant accouchée, pour la delivrer la sage femme dit à une nourrice qui estoit là, qu’elle appuyast fort sur son ventre, ce qu’elle fit, fermant les mains avec grande force, de façon que la femme au bout de trois sepmaines, eut telle suffocation de matrice, qu’elle paroissoit en devoir mourir. Feu Monsieur Riolant fut appellé, qui la fit saigner par mon mary sept fois en quatre jours : elle eut quelque peu de soulagement : mais les saignées ne peurent empescher qu’il ne se feist un abscez dans la matrice, provenant de la confusion que la femme fit en appuyant indiscrettement sur son ventre, lequel luy dura bien trois mois, et en fin vint à suppuration par le col de la matrice, et jetta plus d’une pinte de pus, lequel estoit si purulent qu’elle mesme ne pouvoit sentir ce qui sortoit d’elle, et demeura plus de six mois toute courbée, et depuis n’a peu avoir d’enfans, et selon l’indisposition du temps, ressent de grandes douleurs dans la matrice, qui me fait croire qu’il y pourroit bien estre demeuré quelque fistule. J’escry cecy conformément à ce que j’ay dit quand j’ay parlé d’extirper l’arriere-faix, et de la façon qu’il s’y faut conduire, d’autant qu’il ne se fait point de petites fautes en un accouchement.

L’on m’envoya un jour querir pour aller en un village à deux lieues de Paris, voir la femme d’un Advocat de la Cour de Parlement, laquelle on tenoit malade pour accoucher, elle n’estoit grosse que de sept mois moins huict jours, la cause du mal provenoit d’une grande colere où elle avoit entré contre son fermier [.] Le trouvant qu’il battoit l’un de ses enfans elle se voulut mettre en defence, et l’homme pris du vin et de colere, la pensant ou feignant la vouloit frapper, luy passa une grande perche prés du ventre, laquelle ne fit que glisser [.] Elle s’esmeut tellement, qu’estant proche du terme que les anciens nous ont escrit, que les enfans font des efforts pour sortir, et sont par la nature retenus pour fortifier leur cuir, cest enfant se tourna à chef avec quelque douleur [.] La trouvant ainsi, je luy demanday si elle vouloit accoucher là, ou non, elle me dit que s’il y avoit du temps pour aller accoucher à Paris, qu’elle le desiroit [.] Ne trouvant autre chose que l’enfant tourné sans formation d’eau, je creus qu’elle pouvoit venir à Paris : et suivant mon advis, l’on pourvoit d’une littiere où l’on l’amena [.]

Le fermier fut emprisonné, et si elle fut accouchée avant son temps, sans doute le fermier eust encouru la mort. Je croy que la colere la possedoit tellement, que pour s’en venger elle l’eust desiré : moy qui le craignois extremement à cause du pauvre homme, j’y apportay tous les remedes qu’il me fut possible, la voyant presque tous les jours où je la trouvoy, quand il n’alloit pas à son gré, contre cet homme, que la colere mettoit son enfant tout entre les os [.] Je luy representoy qu’elle se commandast, et que la colere luy faisant accoucher qu’elle couroit hazard de sa vie aussi bien que de l’enfant, et que ce n’estoit pas le moyen de se veoir vengée de son ennemy, et qu’encore qu’elle n’accouchast qu’à son terme, si l’enfant estoit blessé dans son corps, que s’il y avoit quelque chose de rompu qu’il paroistroit ou s’il y avoit contusion qu’estant devenuë noire elle deviendroit jaune, et seroit long temps ainsi, qui seroit un moyen de le faire punir [.] Je procuray si bien pour cest homme que je ne vy jamais, qu’elle escoula deux mois huict jours au lict, au bout desquels elle accoucha d’un fils qui vescut deux ou trois mois, et le fermier sortist sans estre puny que par la bourse.

Je diray à ce propos que les enfans se tournent quelquefois long-temps à quelques femmes avant que d’accoucher, et si elles ne sentent douleur, elles ne font pas y regarder, et que le faisant aussi, si la femme demande à la sage femme si l’enfant est tourné, et qu’elle die qu’ouy et qu’elle n’accouche, la pauvre sage femme est bafoűée, et appellée ignorante, tellement que cognoissant ce qui en peut arriver de la médisance, il faut qu’elle mente et dise que non.

J’accouchay il y a trois ou quatre ans une honneste femme, laquelle auparavant que d’accoucher avoit eu des coliques estranges, et avoit treuvé son enfant fort foible deux jours avant que d’accoucher : ce que estant, le nombril se treuva noüé au droict nœud tenant à l’enfant et à l’arriere-faix, et le nœud tout applaty et serré, et l’enfant fort pers. Ce fut une chose qui m’estonna fort, considerant comment cela s’estoit peu faire, le nombril estoit environ long de trois quartiers, et le nœud estoit à un quartier loing du ventre [.] Elle me dit que pendant sa grande colique que l’enfant avoit estrangement remué. C’est sans doute que les enfans participent à telles douleurs, il fallut que pendant ceste grande agitation il fit le tour du cerveau, et continuant à remuer serroit le nœud davantage, qui fut cause qu’il avoit grande difficulté à respirer et à prendre la nourriture, d’autant qu’il falloit que le tout passat par le nœud [.] L’on ne peut que l’on ne treuve cecy fort estrange, aussi bien que j’ay fait, mais la femme, et trois de ses sœurs qui l’ont veu, sont vivantes pour en tesmoigner la verité.

En l’année mil six cens dix une honneste Damoyselle que j’ay accoustumé d’acoucher passant devant nostre logis s’arresta à moy, et me dit qu’elle estoit grosse de quatre mois, et qu’elle avoit senty remuer son enfant ; il y avoit quatre jours qui estoit à trois mois et demy [.] Environ un mois apres elle me vint voir, et me dit qu’elle estoit bien en peine veu qu’il y avoit deux jours qu’elle n’avoit senty remuer l‘enfant, qu’elle avoit crainte qu’il ne fut mort, pour une extreme peur qu’elle avoit euë me disant qu’elle avoit eu une insupportable douleur des dents [...].

J’avois accouché plusieurs fois la Damoiselle laquelle avoit les enfans et les delivres sains, de bonne couleur, non pierreux, ny le sang bruslé non blaffard ny putride qui me fit croire qu’estant saine et bien composée, si l’enfant estoit mort nature l’expulseroit en temps opportun, et qu’elle ne veut estre forcée, n’ayant donné aucun tesmoignage de defaut, et que lors que le temps d’accoucher seroit passé si nature se monstroit imbecille nous consulterions avec de bons medecins pour le luy faire rendre [.] Plusieurs de ses amies m’en parloient doubtant qu’elle se fust trompée en ce qu’elle avoit creu estre grosse à qui j’asseurois pour elle que non [.] Bref elle porta l’enfant depuis la frayeur seize sepmaines. Il y a maintenant un grand doubte, si l’enfant mourut sur l’heure de la frayeur veu que depuis il ne se remua jamais.

L’enfant venant à s’amoindrir, et abaisser  dans la matrice, fit place au sang retenu qui ne sortit que pendant et depuis l’accouchement, qui fut tel qu’à la fin de la seiziesme sepmaine de la peur, qui faisoient huict jours moins que neuf mois, il luy print la nuict des douleurs[.] Elle pensant ne se faire tort de les supporter, attendant le matin pour appeler le secours, et desirant laisser son mary en repos, qui estoit homme d’estude, passa ainsi la nuict [.] Le matin venu me fit apeller, se treuvant si acablée de foiblesse, plus que de douleur qu’elle n’en pouvoit plus, j’y entre, et treuve un Medecin avec plusieurs Dames et Damoyselles de ses amies [.] Le Medecin m’attendant ordonna un clystere carminatif, pour luy bailler si je le treuvois à propos. Je la treuve pasle, froide, en sueur avec si peu de pous qu’elle sembloit plus proche de la mort que d’autre chose [.] Je la touche et recogneus qu’il y avoit travail, lequel avoit esté negligé. Je demande s’il y avoit quelque malade proche pour recouvrer quelque bon bouillon, à cause que l’heure estoit indeuë d’en avoir au logis [.] L’une de ses dames alla querir une plaine escuelle d’argent de consommé chez un voysin, je le mis sur un rechaut avec le jus d’un demy Citron, elle s’y força, cela rechaufa et restaura un peu la nature qui luy donna quelque douleur, à laquelle j’ayday, luy donnant courage [.] Cependant les eaux rompirent, et aussi tost elle fut soulagée, ses forces remises, à la premiere douleur les jambes et cuisses de l’enfant sortirent [.] Moy sentant l’enfant mort, et voyant qu’il ne luy venoit plus de douleurs, je craignois de le tirer de peur de pourriture [.] Je luy bailla le clystere sans se remuer, à l’efort duquel le rendant, elle rendit l’enfant repercuté de couleur plombine, sans aucune mauvaise vapeur, l’arrierefais sain et beau autant que l’on sçauroit dire, avec les plus belles purgations.

Cela nous aprend bien à admirer les effects de la nature qui sont admirables, et neantmoins il la faut contempler afin que si elle defaut, qu’elle soit secouruë, tesmoin la Damoiselle de qui je parle, que si elle eut recherché le secours en temps et lieu elle eut beaucoup mieux fait qu’elle ne fit, car elle hasarda sa vie d’autant que nature fit tout son pouvoir pour jetter cest enfant mort et elle y resista ne faisant valoir ses douleurs et ne se mettant en posture propre, tellement que nature ne le pouvant jetter, estant affoiblie fit une revulsion en hault de la chose contenuë qui luy causa les accidents susdicts.

Je cognois un Chyrurgien lequel en sa jeunesse servy feu Maistre Ambroise Paré, nommé Philippe Baudoin demeurant à Cherebourg en la basse Normandie lequel a veu une femme nommée Fleurye Gardin femme de Richard Feré, de la paroisse de Touleuast pres Cherebourg, laquelle estant le jour de Noël à l’Eglise grosse de six mois et demy, le bras de son enfant sortit de son corps ; estant à un quart de heure de sa maison, fut ramenée par des femmes en icelle, ou estant arrivée le bras se remist, et demeura d’acoucher jusques au commencement de Mars, auquel temps elle acoucha naturellement d’un fils, lequel fut baptizé et vesquit un jour, qui est une chose estrange, et qui possible n’arriveroit en cent ans.

Il est certain que l’enfant se remuant violemment peu[t] estre attaint de quelque colique causée du froid que sa mere avoit enduré, et trouvant les membranes deliées, comme elles le sont beaucoup plus aux unes qu’aux autres, fut cause qu’à l’endroit de sa main elles rompirent, qui estoit au costé proche du gasteau, ou gros de l’arrierefais, qui ne fit escouler les eaux qui soustiennent l’enfant qui demeurent en une poche plus bas. La femme estant chez elle fut chaudement couchée, et l’enfant ayant eu le bras et la main refroidies les retira sentant la chaleur avec bien peu d’ayde ou point du tout.

Au commencement de l’année mil six cens dix un docteur en medecine de ceste ville me pria d’aller avec luy voir une femme laquelle on tenoit estre en travail despuis neuf ou dix jours de laquelle on croyoit plustost la mort que la vie [.] Neantmoins il desiroit fort avoir mon advis pour luy apporter tout le secours qu’il luy seroit possible en faveur de ceux qui l’en avoyent prié, et que ce qui le fachoit davantage estoit la crainte qu’il ne feut trop tard pour la secourir [.]

Nous y feusmes ou nous trouvasmes une femme qui sembloit tournée à la mort, un visage pasle, qui tenoit les yeux ouverts, et fixes, le nez estre cy, l’haleine qui sentoit le mortuaire, en l’estomac de laquelle n’estoit rien qu’il ne feust aussi tost revomy, elle eut bien beu en une heure deux pintes d’eau, aupres de son lict estoit une mare de ses vomissemens [.] L’on ne pouvoit plus fournir à luy faire bouillir de l’eau, de façon qu’on la luy donnoit toute cru, et souvent un jaune d’œuf qu’elle rendoit à l’heure mesme [.] Elle estoit sans douleur d’enfant, mais trouvant la matrice ouverte et des eaux commencées à former mole et demeurée je cogneus bien qu’elle avoit travaillé, mais que la nature estoit acablée, et n’ayant esté aydée, l’enfant estoit remonté qui l’estoufoit, et provoquoit tel vomissement [.]

J’en dis mon advis au Medecin, et bien que je creusse que nous feussions venus bien tard, il faloit neantmoins faire ce que l’art commande, et partant nous resolumes de luy donner un clystere assez fort pour reveiller la nature, et pour baisser l’enfant. Le Docteur ayant demeuré là quelque temps et ayant ordonné tout ce qu’il jugea à propos apres avoir exactement sçeu qu’il y avoit dix mois et neuf jours qu’elle n’avoit eu ses purgations et qu’elle estoit devenu grosse au temps qu’elles la devoient reprendre, qu’elle avoit porté l’enfant neuf jours plus que les neuf mois, il me remit l’affaire entre les mains Je luy fis prendre le clystaire qui fit baisser l’enfant, comme nous l’avions esperé, je luy fis boire de l’eau de Rheubarbe qui se trouve faite chez nous qu’elle ne revomit point, à quelque temps de là un jaune d’œuf qui demeura aussi, je luy fis de l’eau de Rheuarbe pour ne boire autre chose, et d’heure en heure je luy faisois prendre un jaune d’œuf lequel demeuroit, alors nature commença à se fortifier et ses douleurs d’enfant commencerent à revenir, à moins de deux heures apres le clistaire prins, et la nourriture demeurée [.] Lors que je vis le mal en estat et que la foiblesse s’oposoit à l’expulsion de l’enfant je luy donna[y] demie dragme de confection d’alchermes dans du vin, et peu apres je luy fis faire un autre clystere, ou je fis adjouster de la biere, et de la benedicte, lequel fit achever l’œuvre [.] Elle acoucha sur la fin de l’operation d’un fils fort gros et puissant, lequel estoit extremement foible, et vesquit deux jours [.]

J’arrivay en la maison à une heure et demie apres midy, et elle acoucha avant neuf heures du soir [.] J’escrits les particularitez pour dire que souvent faute de cognoistre le mal, il s’en fait de mauvaises cures, et sur tout les coliques meslées au travail ou arrivant quelque peu avant, font de ces coups là [.] C’est pourquoy une femme estant sur son neufviesme mois doibt estre secourue par clysteres, car par tel moyen le mal s'ayde ou renforce et l'on en sort.

 Peu de temps avant la naissance du Roy a present regnant : je fus appellée aux faux bourgs Sainct Germain, pour voir une Damoiselle Angloise en apparence de fort bonne maison et femme fort honnorable, laquelle croyoit estre grosse de trois mois et demy qui est un des termes où se rendent ordinairement les faux germes : ayant commencement de perte de sang et douleur, me fit prier par son hostesse de la voir, ce que je fis, ou je jugeay qu’elle avoit un faux germe, à quoy j’aportay tout ce que l’art commande voyant les longues douleurs sans qu’elle le peut expulser, pendant lequel temps, je la vis avec monsieur son mary en de grandes apprehensions, chose dont je m’estonnois veu que pour longue que je visse l’affaire je ne la trouvois nullement dangereuse. Les voulant donc resoudre à quitter ceste apprehension leur representant que le temps le chasseroit avec les remedes, et que les desplaisirs retiennent quelque fois la chose conceu, m’ayant dit que quelque mutation du pais avoit causé l’exil de son mary, il me conterent tous deux, que leur apprehension estoit causée d’un accident survenu depuis quelques années à une sienne sœur plus jeune qu’elle mariée à Londres [.]

Laquelle estant devenue grosse porta fort bien son enfant jusques au terme de neuf mois, au bout desquels elle entra en douleur, comme d’accoucher, où la mere et deux de ses sœurs avec celle-cy furent appellées, comme fut la sage-femme, qui toutes avoient eu des enfans, car elle estoit la plus jeune [.] Les douleurs furent grandes et longues, à l’abord desquels elles ne s’estonnerent point, veu que c’estoit son premier enfant [.] Les douleurs toutesfois ne firent jamais aucune apparance d’accoucher, comme de dilater l’orifice exterieur  de la matrice et durerent deux jours et deux nuicts, sur la fin duquel temps les Medecins furent appellez qui rapporterent la cause de cecy  à son premier accouchement [.] C’est pourquoy plusieurs remedes furent faits pour le faciliter, et neantmoins le mal passa sans autre aparence [.] Ce fut dés l’heure qu’elle ne sentit jamais bouger  son enfant ; depuis il en fut fait consultation, où les Medecins et les Chyrurgiens conclurent, que pendant les douleurs l’enfant s’estoit efforcé et avoit fort remué et s’estoit lassé, estant à presumer qu’elle s’estoit trompée à remarquer le temps d’autant qu’elle estoit jeune, et que c’estoit son premier enfant [.]

Elle se portant fort bien, à trois ou quatre jours de-là s’estant reposée et s’ennuyant  à la ville, s’en alla promener en hacquenée selon la coustume du pays en une sienne maison aux champs, de laquelle estant de retour sans avoir jamais remarqué qu’elle se fut blessée, au bout d’un mois qu’elle avoit eu  ses douleurs elles la reprindrent  comme auparavant ou chacun fut appellé, elles durerent un jour et une nuict, puis cesserent  comme auparavant [.]  Les Medecins et Chyrurgiens attribuerent toutes ces douleurs à douleurs de colique et qu’indubitablement elle avoit eu  les premieres douleurs à sept mois lors que  comme dit Hypocrate l’enfant fait des efforts pour sortir, et que la cause estoit manifeste que l’enfant ayant esté travaillé se reposoit joinct qu’il n’y avoit aucune aparance de croire qu’il fut mort, veu le bon teinct et le bon appetit de la mere, et toute bonne et entiere disposition, sans pouvoir remarquer un seul point des signes qu’Hippocrate[,] Galien et les  autres Medecins ont remarqué pour cognoistre quand un enfant est mort [.]

Elle demeura donc encore un mois en l’estat precedent, qui fut l’onziesme accomply, à la fin duquel luy print  quelque petite douleur, comme tranchées qui à l’instant se tourna en mal de cœur. Elle se fit mettre sur le lict où on luy aporta du vin, et à l’instant mourut sans qu’on eut loisir d’appeler aucun secours  [.] La voyant morte on remarqua  au costé droit du ventre une tache noire grande comme une dale [.] Estant ouverte on treuva l’enfant tout pourry, et les os lachés d‘avec la chair tout en pus, et qu’elle n ‘avoit esté attainte de foiblesse que la gangrene n’eust attaint et penetré le panicule charneux.

Ceste mort tesmogne bien qu’il n’y a regle si estroite où il n’y aye quelque exception. Ceste observation est aussy bien differente à l’observation seconde ch. 39 du I liv. la Nature voulant estre admirée en les effets parce qu’en certains endroits ils sont incomprehensibles aux hommes, et neantmoins je crois que les deux maladies estoient semblables, estant les maux de l’une et de l’autre, coliques. Ce fruict icy estoit meur qui ne pouvant tomber se pourrit, car la colique negligée empescha que l’enfant ne se peut avancer, ny se produire en lumiere, et à l’autre elle arriva devant la maturité, qui le fit retirer, et comme si l’on voloit dire faner quelque peu, mais non mourir, joinct que le secouors qu’elle receut par le moyen des clysteres l’en empescha. Partant en maux de femme grosse où il n’y a douleur frequente et que rien ne s’avance, que la matrice au lieu de s’ouvrir se reserre plustost, à terme ou non, il faut croire que ce sont coliques lesquelles il faut oster par clysteres carminatifs réiterez selon la necessité [.] Si cela eust esté practiqué en ceste cy, elle ny son fruict ne fussent ainsi peris.este mort tesmogne bien qu’il n’y a regle si estroite où il n’y aye quelque exception.

Je cognois une honnorable Dame laquelle avant et apres son mariage a esté extremement vexée des palles couleurs, laquelle a eu recours aux remedes de certaines poudres dont elle a esté soulagée, et non parfaitement guerie [.] Une femme prent les remedes, comme une selle à tous les chevaux, sans juger qu’en ayant usé un certain temps l’on s’en doibt contenter, et qu’en usant davantage cela peut nuire, d’autant qu’il est à presumer qu’il y a quelque autre incommodité qui empesche la guerison. La Dame donc continuant devint grosse, et fut assez long temps à en user depuis sa grossesse sans avoir soupçon de l’estre, car alors que à cause de sa grossesse elle se treuvoit mal, elle s’eforçoit d’en user plus souvent, qui fut cause qu’elle accoucha avant le terme, lequel avoit telle quantité de sang, et si noir et bruslé que je ne vis jamais rien de tel, car il sembloit hydropique.

Je parleray icy d’un mal que j’ay veu à une jeune femme, pour et afin qu’en voyant un pareil l’on y apporte pareil remede. Une marchande de ceste ville me vint trouver, pour me communiquer d’un grand mal qu’elle avoit, et me prioit  s’il y avoit remede, de le luy enseigner, et sur tout à faire qu’elle peust accoucher sans que le Chirurgien qui l’avoit desja accouchée deux fois ne tuast ses enfans. Je sçeus qu’un mauvais mary qu’elle avoit , luy avoit donné un coup de pied dans le petit ventre, et luy avoit rompu le peritoine qui estoit cause que partie de ses intestins estoient comme le gros d’une petite cornemuse, pendant sur l’os pubis, auquel lieu (estant grosse) la matrice se jettoit, tellement qu’estant au terme d’accoucher, l’enfant ne se pouvoit tourner, de sorte que la sage femme, voyant qu’elle ne pouvoit avoir l’enfant sans le perdre, excitoit les assistans d’envoyer appeler le Chirurgien.

Je consideray le mal, et luy ordonnay de porter d’une sorte de bandes que portent les femmes grosses pour supporter leur ventre, un peu moins creuses, et luy conseillay de les mettre comme l’on fait un brayer, s’entend couchées tout à plat, avec des compresses dedans, et ne se lever jamais sans cela, grosse ou non. Ce qu’elle a fait et porté, et porte de beaux enfans qui viennent fort bien dont elle accouche heureusement.

DE DEUX ACCOUCHEMENS D’UNE DAME DE LORRAINE

Une dame de Lorraine riche extremement, et desja assés âgée devint grosse, elle et tous les siens eurent le soin de faire chercher deux sages femmes les plus estimées du pays, pour l’assister en son accouchement [.] L’heure d’iceluy venue, elles firent ce que l’art leur commandoit, qui fut que l’enfant venant bien, en asseurer les proches, la tenir en bonne situation, la faire manger à propos, la tenir moderement chaude, puis la faire conduire ses douleurs bien à point. J’excuse la passion des amis et leur impatience, mais je ne ferois pour personne chose contre mon devoir pour complaire ; une faute est tost faicte, et le repentir en est long [.] L’on eust voulu que ceste dame fust accouchée promptement, et malgré tout le monde, il faut attendre l’heure que Dieu y a mise, et sur tout aux accouchemens naturels où il ne survient point d’accident [.] Cette dame fut assez long temps (comme la plus grande partie des femmes sont des premiers enfans.

Pendant lequel temps Monsieur son mary vaincu d’impatience se tourmentoit fort, l’on luy dit le voyant douter du rapport des sages femmes, qu’il y avoit un habile Chirurgien en une ville proche, qui estoit là pour quelques affaires, et qu’il le pouvoit avoir pour l’oster de doute [.] Il l’envoya tost prier de venir chés luy, ce qu’il fit, qui fut sur l’heure que la Dame devoit accoucher [.] Si tost qu’il fut arrivé, il cognust que l’enfant estoit proche de sortir : les sages femmes qui par commandement de Monsieur son mary, luy avoient cedé la place, croyant la reprendre luy ayant touché pour en faire rapport, furent trompées : car luy voyant la besoigne proche d’estre faicte. Il commenca à dire, « Monsieur il est bien necessaire que j’opere icy, toutesfois je procederay avec telle industrie que je vous ameneray un enfant vivant, et vous rendray la mere vive et saine. » Les sage-femmes voulans parler furent bafoüées, et à elles imposé silence, comme voulant resister au dire d’un oracle [.] La Dame accoucha tost où il [le Chirurgien] ne servit non plus que pouvoit faire son lict pour le recevoir [.] Les pauvres sage-femmes avoyent travaillé et paty longuement  attendant, et pendant le travail ; en change de grandes recompenses elles eurent grand blasme et peu de salaire, leur disant que sans cét habille homme que la Dame estoit morte [.] Il fut cheri de tous, retenu, et eust recompense de cinq cens escus, et fut prié par le seigneur et la Dame, que si Dieu leur donnoit jamais d’enfans, qu’ils le supplioient de les vouloir tant favoriser, que luy envoyant une bonne haquenée avec un gentil –homme pour sa conduite, d’y vouloir aller trois mois devant, et qu’il feroit bonne chere et passeroit bien son temps : que pour la recompense ils luy promettoient que de tous leurs enfans il auroit cinq cens escus. Il leur promet.

Estant de retour, à quelque année de là, il fut mandé par ce Seigneur, ainsi qu’il avoit esté dit, fut conduit et rendu au lieu, où il fut reçeu comme un Prince [.] Monsieur cherchoit tous les jours nouvelle invention de luy faire passer le temps, il avoit sa haquenée sur laquelle personne ne montoit que luy, et alloit promener par tout où bon luy sembloit, les serviteurs avoient tous commandement de luy obeyr en tout, et le mener par tout, pourveu que l’on sçeut où il seroit allé.

L’heure de l’accouchement arriva que le seigneur estoit allé visiter l’un de ses amis : ayant un si grand repos sur ledit Chirurgien qu’il ne doutoit rien pour sa femme. Le travail ne fut pas comme le premier dont l’enfant venoit bien, car il venoit mal [.] Il tira les pieds les premiers, lors que le corps fut sorty il ne pouvoit avoir la teste [.] Il tira tant qu’il arrascha le corps et laissa la teste [.] Il n’avoit porté aucuns ferrements, croyant que l’accouchement deust ressembler au premier [.] Se voyant en peine, il envoya à deux lieuës de là, à un Chirurgien pour avoir un crochet, attendant lequel il envoya à la cuisine querir une cueillier à pot, pour avec le crochet du manche tirer la teste de l’enfant : il tira si bien qu’il l’eust et la vie de la mere ensemble [.] Il descendit à l’escurie et n’appella aucun valet pour luy celler sa haquenée, et ne dit adieu à personne, mais bien fit grande diligence de fuyr [.] Voilà une extreme affliction pour le mary estant de retour, et une grande punition sur luy du tort qu’il avoit fait aux sages-femmes, lesquelles à mon advis n’eussent desiré sinon que Monsieur et sa femme eussent bien sçeu la verité. Je hay autant les prodigues de la vie d’autruy pour gaigner de l’argent, que les Docteurs en medecine hayssent les charlatans et Empyriques.

Je fus un jour retenuë pour accoucher une marchande, laquelle portoit bien ses fils et ses filles à terme, mais venant à l’accouchement des fils, il estoit plus difficile que celuy des filles : auparavant je l’avois accouchée d’une fille. Ses fils estoient tout d’un costé, et sur tout la teste y estoit emprainte à quoy il y avoit remede, lequel se pouvoit faire avec le temps, adresse et patience.

Je fus appellée à midy, et la trouvay jambes nuës qui se pourmenoit par la chambre en un temps qui n’estoit pas chaud [.] Je la fis mettre dans le lict, pour la reschauffer, auquel elle ne voulut aucunement durer [.] Comme je la priois de ce faire, elle se faschoit contre moy, et me disoit que ce n’estoit pas son humeur que d’estre contrainte, et que despuis quatre heures du matin elle estoit en tel estat sans que sa garde l’en eust reprise, c’estoit une nourrice qui l’avoit autrefois servie (plusieurs se servent de telles gens pour avoir une chere liberté) [.] La maistresse et la garde se banderent contre moy, je fermois les yeux à tout cela, la nuict s’approcha, ses eaux estant percées, je craignois un mauvais succés  à l’affaire qui se faisoit irremediable par son opiniastreté[.] Je le dis au mary particulierement qui y fit son pouvoir, et n’y peut non plus que moy.

Vers la minuict je la priay tant de se mettre au lict et de se laisser chauffer, et que sans cela je ne pouvois rien [.] Elle me dit que  je n’y entendis rien au regard d’un certain Chirurgien, qui à un pareil accouchement la touchant du bout du doigt la delivra, et qu’elle le vouloit avoir. Je luy dis qu’elle le pouvoit faire, et que ce seroit mon grand contentement que de la voir bien accouchée : elle l’envoya donc appeler, il vint tout gaillard, mais l’œuvre n’estoit pas en l’estat que le precedant accouchement  [.] Il met une grande serviette devant luy, se trousse jusques aux coudes, et luy dit  qu’il estoit aussi capable  de la delivrer qu’il l’avoit esté l’autre fois [.] Elle ne me voulut plus voir depuis son arrivée [.] Estant le profond de la nuict et ne sçachant avoir personne  pour me reconduire, il me fallut tenir exilée en un coing de la maison. Monsieur le Chirurgien à qui je representay dés son arrivée tout ce que j’avois entendu  et veu, et la crainte que j’en avois  et que le temps emporte tout, me dit qu’il en viendroit bien à bout [.] Ce qu’il fit, le matin elle fut autant avancée qu’auparavant [.] A la pointe du jour j’entendis que l’on me demandoit pour accoucher une mienne voisine [.] Je prie le mary de me laisser aller, veu que j’estois inutile à sa femme qui ne me vouloit voir ne sentir [.] Il ne le vouloit permettre qu’à la charge que je jurerois de retourner apres ce que je luy promis.

Je fus donc voir ma voisine qui accouchoit bien, et fus à l’instant mandée pour accoucher une Dame signalée, qui portoit un enfant mort, il y avoit huict jours [.] Je le sçavois bien, et neantmoins n’ayant indisposition autre que de ne le pas sentir, je laisse venir les douleurs et sans accidens manifestes, comme mal de cœur ou de teste, ou vapeurs à la bouche, je conseillay de laisser faire nature, et lors qu’elle montreroit se vouloir défaire de ce qui luy nuisoit, et qu’elle en pourroit venir à bout, je serois d’avis de luy ayder [.] Je reçeus cét enfant de sept à huict mois tout gasté, et l’arriere-fais tout pourry dont l’ombilic avoit quitté pres du gros par sa pourriture. Je fis l’operation en la presence de Messieurs Hautin, Duret, et Seguin, et du Chirurgien qui accouche les femmes le plus ordinairement, lequel vouloit m’ayder, ce que je ne voulus permettre, d’autant que je me sentois capable de le faire sans accident pour la Dame.

J’euz le soin de m’aller dégager de mon serment envers le mary de cette femme. Ainsi que j’entre sur le midy la servante qui m’ouvrit me dit, « Madame n’est pas encore accouchée, mais si tost que vous estes sortie le Chirurgien a envoyé querir  une autre sage-femme qu’il dit estre sa bonne amie. Je la prié de dire à son maistre comme j’estois retournée, et comme il estoit plus que temps que l’on accouchast sa femme, et que puis que son Chirurgien ne l’avoit peu accoucher qu’il eust celuy qui en faisoit profession [.] Ils passerent tout le jour et la nuit : et le matin les parens envoyerent appeler l’autre Chirurgien (voyant que celuy dont j’ay parlé l’avoit abandonnée) qui leur dit qu’il estoit trop tard, qu’il l’accoucheroit bien, mais qu’elle en mourroit ce qui arriva le soir. Voilà ce que valent les opiniastretez à aucunes femmes qui ne veulent pas croire [.] Je la pouvois accoucher s’elle eust voulu avant la nuict du jour que je fus appellée [.]

Cecy servira d’exemple à d’autres [.]  Je diray en passant que j’ay eu l’honneur d’avoir accouchée la Reyne de tous ses enfans, où je n’ay esté contredite du Roy ny d’elle, ny des medecins, ny Dames [.] J’ay aussi accouché plusieurs Princesses et dames sans contredit, et n’en ay trouvé que chez les mediocres, le tout manque de jugement.

D’UNE FEMME QUE J’AY ACCOUCHEE DEUX FOIS, ET LA DIVERSITE DES DEUX ENFANS PROCEDANS DE MESME CAUSE

Je fus appellée pour accoucher une femme, laquelle disoit estre à son terme, elle eust les douleurs, ainsi qu’ont accoustumé d’avoir les autres femmes [.] Ses eaux ne rompirent point : à une forte douleur elle jetta une grosse membrane ainsi qu’une vessie de pourceau toute unie dehors et dedans, excepté qu’elle avoit de petites ramifications de veines, ainsi qu’il s’en voit à une vessie, laquelle je fendis promptement, où je treuvay une petite fille fort bien formée, nageante dans des eaux noires [.] Elle estoit à terme, et estoite si maigre qu’elle sembloit un enfant en chartre, elle avoit son ombilic tenant à un des endroits de  la vessie, où il est à presumer qu’aboutyssoyent les petites ramifications dont j’ay parlé, ou tant qu’il se trouva  du sang elle languit, et venant à defaillir elle moururt, ce que faisant elle rendit  ce peu d’excremens qui estoit contenu dans ses intestins, qui destrempé dans ses eaux les rendit noires, comme je les trouvay ; la femme est tellement humide qu’il ne se peut dire davantage. 

AUTRE ACCOUCHEMENT DE LA MESME

Une autre-fois je fus appelée pour l’accoucher, elle accoucha d’un fils qui vint à l’ordinaire le chef devant, ce que sentant, je ne trouvois qu’une mollesse, comme les eaux furent percées, je sentis une peau avec du poil, au travers de laquelle je sentois comme de grands coupeaux ou taiçons de pot larges et desliés, l’enfant nay estoit formé au corps, le visage et la teste estoient comme ces testes de masques que vendent les bonnetiers, où il y a forme de nez, mais mol, comme n’estant fait  que de laine [.]

OBSERVATION ADMIRABLE D’UN PETIT ENFANT DE TROIS MOIS ET DEMY, OU A TOUTE EXTREMITE DE QUATRE MOIS

La sage-femme de l’Hostel-Dieu a autresfois demeuré avec moy, et depuis que je vis ma plus jeune fille resoluë de suyvre ma vacation, je pensay qu’il estoit necessaire de luy faire voir accoucher une grande quantité de femmes en peu de temps, pour se rendre resoluë et ne se point estonner de divers accouchements : je priay donc la sage-femme dudit lieu, et la religieuse qui est Dame des accouchées, qui est de mes amies, de l’envoyer advertir lors que du jour il accoucheroit des femmes [.] Elle y a esté de fois à d’autres six ou sept mois, elle en a veu accoucher grand nombre, et en a accouché plus de cinquante avant que d’avoir quinze ans accomplis [.] Ladite sage-feme y a apporté tout ce qu’elle a peu, et mesme s’il s’y trouve quelque chose d’estrange, elle a le soing de luy faire voir.

Entre autre chose, une pauvre femme malade de fievre y accoucha d’un petit garçon sans penser estre grosse, lequel fut ondoyé par la sage-femme [.] Il ne paroissoit pas estre de plus de trois mois et demy ou de quatre à toute extremité, lorsque l’on le vit vivre, aprés avoir delivré sa mere du reste [.] L’on le porta sur les fonds recevoir le Baptesme, où elle m’asseura qu’il avoit fait un petit cry, et fut nonmé Charles par le Chirurgien. Apres elle l’enveloppa de petits linges chauds et l’apporta monstrer à ma fille [.] Il demeura bien une heure ou plus chez nous, et fut remporté encor vivant [.]

Cela monstre bien qu’il y a des enfans beaucoup plus plains de vie les uns que les autres. C’est ce que j’en ay dit, qu’il y en a que si tost qu’ils sont naiz meurent, comme font certains poissons si tost qu’ils sont hors de l’eau [.] Et d’autres qu’il n’y a point d’apparence qu’ils puissent vivre estans à trop bas terme, et neantmoins ont grand’ peine à mourir [.] C’est selon qu’ils sont plains de vie les uns plus que les autres.

 JE CERTIFIE D’AVOIR VEU L’ENFANT DE PIERRE : DE SENS, DONT FEU MONSIEUR D’ALIBOURG A ESCRIPT

Encores que plusieurs personnes croyent asseurement qu’un enfant mort ne peut demeurer plus de neuf jours dans le ventre de sa mere, j’ay veu neantmoins l’enfant de pierre, dont j’ay parlé en l’observation 7. chap. 33 de mon premier livre, dont j’avoys ouy parler à feu Monsieur Du Laurens, et comme sa mere le porta vingt et sept ans. Il estoit entre les mains d’un notable marchant de ceste ville nommé Monsieur Preteségle, homme fort curieux de choses rares, lequel me le monstra avec le discours qu’en a escript feu Monsieur d’Alibourg, premier Medecin du Roy Charles, qui fit faire en sa presence ouverture du corps de la mere, et a escript qu’elle le porta neuf mois, sentent sans douter de sa grossesse, l’ayant senty se remuer au temps que les femmes doivent, et jusques à neuf mois accomplis, au bout desquels elle ne le sentit plus [.] Il a escript qu’elle le porta en tout vingt et sept ans, et n’en delivra de sa vie, ains fut tiré apres sa mort [.] Il manqua une main, laquelle demeura adherante à l’arriere-fais, lequel estoit aussi reduit en pierre comme le corps.

Je diray bien avoir tiré à des femmes subjectes à la pierre, l’arriere-fais tout pierreux, et par plusieurs fois à une mesme femme, et à plusieurs femmes aussi, reprenant ce que j’ay dit, qu’un enfant mort se petrifie, repercuté, ou petrifié estant mort, et retenu long-temps au ventre de sa mere.

OBSERVATION D’UNE DAME, QUI EST MORTE LE SIXIESME JOUR DE SON ACCOUCHEMENT, ET DE LA CAUSE.

      Environ le mois de Septembre mil six cents trois, une Damoiselle de la paroisse de Sainct André des Arts, me vint trouver pour avoir mon advis sur la maladie d’une sienne sœur, qu’elle me dit avoir esté traictée d’un Medecin de la Cour sien parent par l’espace de cinq mois et demy, pendant lesquels elle dit, que sa dicte sœur eust de temps en temps de grandes pertes de sang à baston rompu sans aucune regle, que pour lors elle n’en avoit plus  et qu’elle craignoit grandement, qu’il n’eust du danger, veu que dés le commencement de son mal ledict Medecin l’avoit jugée hydropique, et l’avoit traictée pour ceste maladie-là, et qu’encores que par ses remedes il luy eust faict faire des evacuations estranges, elle grossissoit  tous les jours, et avoit quelque fois des estouffemens, et qu’elle voyoit bien , qu’il ne luy sçavoit plus que faire, qu’il luy sembloit que si l’on luy pouvoit faire avoir ses mois, qu’elle s’en porteroit mieux, et qu’elle me prioit, si je sçavois quelque chose, qui les luy peust provoquer de luy enseigner.

Ayant entendu son discours, je m’imaginay qu’elle pouvoit bien estre grosse en ayant veu plusieurs semblables, je luy demanday à la veoir, pour en juger sainement [.] L’ayant veüe et entendüe parler, par ce que l’on donne souvent jugement contraire au mal, qui se rapporte par un tiers, elle me dit, qu’elle estoit à Sainct Cloux, à cause de la contagion, je m’offris d’y aller, quand il luy plairoit [.] Elle m’y mena donc, où je la trouvay grosse de tout le temps de sa maladie ; je frottay de la marjolaine franche dans mes mains, que je luy mis sur le nombril, incontinent l’enfant se remua bien fort ; elle se plaignit à moy, qu’elle sentoit de grandes pesanteurs au dessus des aisnes, j’avois porté un emplastre propre pour le mal de mere, à cause que sa sœur m’avoit parlé des ses estouffements, afin que si c’estoit cela, de la soulager promptement, parce qu’elle arreste la mere en sa place si elle surmonte ou baisse trop, elle la tient où il faut, elle sert grandement à tenir l’enfant aux femmes subjectes à accoucher avant terme [.] Je la laisse bien aise de sçavoir la cause de sa maladie, dont auparavant elle n’avoit eu aucune certitude.    

La contagion estant passée, elle retourna en ceste ville au mois de Novembre [.] Elle m’envoya querir, où je la trouvay, perdant des eaux sans aucune douleur peu à peu [.] Je m’informay d’elle, si elle n’avoit eu aucune douleur, lors que cela avoit commencé [.] Elle me dit qu’elle avoit eu  une petite, lors que cela avoit commencé et non depuis [.] Je demeuray long-temps aupres d’elle  sans qu’elle sentit aucun mal, me souvenant, que j’en avois veu d’ordinaire vingt-quatre heures, ou deux fois vingt-quatre heures, voire en ay-je veu jusques  à huict jours, dont les issuës en ont esté bonnes [.] Je creu qu’il falloit attendre la douleur et le temps, auquel la nature s’en voudroit defaire pour la secourir, au cas qu’il en fust besoin [.] Je la priay donc de se tenir au lict pour ne gaster rien, et luy dis, qu’il n’estoit besoin d’aucun remede, que s’il leur plaisoit appeler du conseil, pour le contentement de leurs esprits, et non pour autre chose, ils le pouvoient faire, et sur tout je desirerois, qu’elles appellassent son parent, qui l’avoit traictée comme hydropique [.]

Je la voyois tous les jours, et au bout de trois ou quatre jours, je fus appellée pour la veoir, elle avoit des douleurs, où sa sœur estoit, et la femme d’un Conseiller, sa Cousine, une sienne voysine, qui estoit avec nous, quand nous la fusmes veoir à Sainct Cloux avec une Dame damée de ses amies [.[ Le travail fut mediocre, son enfant venoit bien, elle accoucha d’un fils fort foible, et tout noir de sang, il pouvoit estre à sept mois et demy, il vescut trois heures [.] Lors ce que ce vint à la delivrer, je fis ce que je fais aux autres, rien n’y servoit [.] Lors que je recogneus que toute ma peine estoit inutile, il me tomba au cœur, que le traictement qui luy avoit esté faict, comme à une hydropique pourroit avoir desseiché l’arrierefais au fond de la matrice [.] Je creus qu’estant dans Paris, où sont personnes qui font profession  de se trouver aux choses difficiles, que je les devois appeler, et ne voulus porter ma main dans son corps de peur de ne pas si bien faire qu’eux, joinct que c’eust esté donner trop d’avantage à celuy qui estoit cause du mal, de m’y mettre plus avant, d’autant que son père et luy ont tousjours esté portez à me faire du mal. L’on amena un Chirurgien fort honneste homme et habile, que j’ay veu grandement bien faire en beaucoup de lieux, lequel fist ce qu’il peut, et ne peut amener que les trois membranes de l’arrierefais, chorion, allantoïde et amnios avec l’ombilic. Je luy dis, qu’il n’y avoit rien de la masse ou gros, il le voyoit mieux que moy, mais il me dict n’avoir peu avoir autre chose.

J’envoiay appeler un Docteur en medecine de ceste Faculté, à qui je fis tout veoir en la presence du Chirurgien [.] La nuict à ce que dit le matin sa garde, elle vida un callon de sang noir, comme encre, gros comme les deux poings, et apres un gros faux germe [.] Vers le matin, et depuis qu’elle fust accouchée, jusques à ce qu’elle eust vuidé le faux germe, elle avoit si peu de pouls, qu’il ne se peut moins. Je fus le matin la veoir et demeuray long-temps qu’elle reposoit : quand son parent sçeut qu’elle estoit accouchée, il la fust veoir, et donna à entendre à ses parens, que si elle avoit mal, j’en serois la cause, pour ce que j’avois faict appeler le Chirurgien, et que c’estoit des Medecins qu’il falloit appeler, de sorte que j’en fais sages tous ceux et celles qui ont de la raison, pour sçavoir si ce n’est pas œuvre de la main.

Cependant la pauvre Dame mourut le sixiesme jour, où l’on trouva tout le gros de l’arrierefais desseiché au fond de la matrice, où la gangrene s’estoit mise. Je l’escris pour servir  d’exemple à ceux qui se meslent  de traicter des maladies qu’ils ne cognoissent pas, cependant  il a faict ceste faute, et n’a point esté honteux de m’en vouloir donner le blasme : il faut tousjours redouter de traicter une femme grosse, ou non, sans bon conseil, depuis qu’elle est mariée, d’autant que si l’on s’y peut tromper ainsi qu’il fist, ce n’est pas qu’en d’autres maladies il ne s’y sçache bien comporter selon ma croyance, et ne soit habil homme, mais pour celle-là il l’a fort mal entendu, la cognoissance ne luy  en appartenoit à luy seul [.] Il faut que chacune personne face son estat : quand il eust appellé un Chirurgien, ou une Sage femme pour sçavoir si elle n’estoit pas grosse, il n’eust en rien amoindry son authorité, la mefiance est mere de seureté, l’on sçait bien que la medecine est un corps, dont sortent plusieurs branches, comme la pharmacie, Chirurgie, et toutes les dependances, qui sont en grand nombre, qui dependent plustost de la Practique, que de la Theorique. Le feu Roy le sçeust bien discerner à la naissance du Roy, quand en la presence des quatre medecins, peut estre, les plus doctes qui fussent en France, il me donna le premier lieu, leur enjoignant de ne rien faire prendre à la Royne, si je ne trouvois bon, et de recevoir mes advis, et les suivre, parce que mon art gisoit en experience plus que en science, que j’en avois plus veu de cent, qu’ils n’en avoient veu de pieces. C’estoit un honneur que je ne meritois nullement, mais le Roy le voulut ainsi. C’est pourquoy jamais mespris qu’aucun face de moy ne me peut offencer.